У Астраўцы на пажары ў інтэрнаце дымам задыхнулася 34-гадовая жанчына
34-гадовая жанчына загінула ў Астраўцы на пажары ў інтэрнаце. 24 сакавіка мясцовая жыхарка патэлефанавала ў МНС і паведаміла, што з акна інтэрната па вуліцы Школьнай ідзе дым. Выратавальнікі, медыкі і прадстаўнікі іншых экстраных службаў выехалі па выклік.
Як высветлілася, узгаранне адбылося на пятым паверсе будынка ў жылым блоку. Там жыла сям’я: муж, жонка і двое дзяцей. На момант здарэння муж быў на працы, а дзеці — у бабулі. Выратавальнікі знайшлі гаспадыню на падлозе каля канапы ў моцна задымленым пакоі. Жанчыну спрабавалі рэанімаваць, але медыкам усё ж давялося канстатаваць смерць.
Пажар пашкодзіў у блоку бытавую тэхніку, мэблю, закурыў сцены і столь, але не выйшаў за межы гэтага памяшкання.
Прычынай узгарання магло стаць парушэнне правілаў эксплуатацыі электрасетак: праз падаўжальнік да сеткі былі падключаныя абагравальнік, кампутар і іншыя электрапрыборы, перадае прэс-служба Гродзенскага абласнога ўпраўлення МНС.
