Топ-5: навіны 22 сакавіка
![Топ-5: навіны 22 сакавіка](/sites/default/files/styles/gallery_main/public/2023-08/troe3_0.png.webp?itok=22fY3sZb)
Па “справе баевікоў” затрымалі ўжо 11 чалавек
Па “справе баевікоў” затрымалі мінімум 11 чалавек. Неафіцыйны спіс затрыманых апублікавала на сваёй старонцы актывістка Наста Дашкевіч.
Затрыманні адбыліся адразу пасля таго, як у аўторак Аляксандр Лукашэнка заявіў, што сілавікі арыштавалі баевікоў, якія рыхтавалі правакацыі са зброяй.
Так, у Бабруйску затрымалі адразу пяцярых сябраў спартовага клуба "Патрыёт". Сярод затрыманых апынуліся баец спецназа і ратавальнік з МНС. Таксама за краты патрапілі былыя актывісты “Белага легіёну”.
![Топ-5: навіны 22 сакавіка](/sites/default/files/paragraphs/image/img20170310144456.jpg)
У Мінску затрымалі аднаго з лідараў «Маладога фронту» Змітра Дашкевіча. Пра гэта ў Фэйсбуку паведаміла яго жонка Наста.
Па яе словах, невядомыя затрымалі Дашкевіча разам з яго калегам Арцёмам Леўчанкам, калі хлопцы ставілі кухню ў гісторыка Уладзіміра Арлова. Яны замовілі ежу з дастаўкай, але замест піццы ўварваліся міліцыянты ў цывільным, якія і затрымалі маладых людзей.
Акрамя таго, праваахоўнікі арыштавалі Сяргея Пальчэўскага, які знаходзіўся ў машыне Дашкевічаў.
![Топ-5: навіны 22 сакавіка](/sites/default/files/paragraphs/image/dzienvoli361.jpg)
Мінгарвыканкам зноў адмяніў сустрэчу з заяўнікамі акцыі на Дзень Волі. Гэта ўжо другая адмова з пачатку тыдня.
Па словах, аднаго з арганізатараў шэсця Дзяніса Садоўскага, сталічныя чыноўнікі прапанавалі заяўнікам акцыі сустрэцца 24 сакавіка. То бок усяго за дзень да Дня волі.
![Топ-5: навіны 22 сакавіка](/sites/default/files/paragraphs/image/kurapaty-2203.jpg)
25 сакавіка ў Курапатах адбудзецца суботнік. Пра гэта паведаміў старшыня афіцыйнай Федэрацыі прафсаюзаў Беларусі Міхаіл Орда.
Па яго словах, афіцыйныя прафсаюзы заклікаюць усіх неабыякавых грамадзян і арганізацыі незалежна ад палітычных прыхільнасцяў прыняць удзел у гэтай добрай справе. Ён дадаў, што ўжо ідуць заяўкі на ўдзел ад грамадзян і арганізацый.
![Топ-5: навіны 22 сакавіка](/sites/default/files/paragraphs/image/adesa-2203.jpg)
У Адэсу прыбыў танкер з іранскай нафтай для Беларусі. Пра гэта 22 сакавіка паведаміў намеснік генеральнага дырэктара "Беларускай нафтавай кампаніі" Сяргей Грыб.
Па яго словах, танкер прывёз 80 тысяч тон нафты і ўжо разгружаны. Першая партыя чорнага золата мусіць паступіць на Мазырскі нафтаперапрацоўчы завод на працягу гэтага тыдня.