Тэлеграм-канал з наркотыкамі, які рэкламуюць трафарэтчыкі, закрыўся
![Еўрарадыё/Аляксей Карпека](/sites/default/files/styles/gallery_main/public/2023-08/narkota.jpg.webp?itok=tPbWGsj6)
Еўрарадыё/Аляксей Карпека
Многія спальныя раёны Мінска распісаныя рэкламай тэлеграм-каналаў, праз якія можна купіць наркотыкі. 24 сакавіка перастала працаваць адна з такіх крамаў, на якую было падпісана больш за 1000 чалавек.
"Крама закрытая. Усім дзякуй за тое што былі з намі ў лс не флудзіце бо мы самі нічога не ведаем", — такое паведамленне замацаванае ў чаце для зносін прадаўцоў і пакупнікоў (арфаграфія захаваная).
![Телеграм-канал с наркотиками, который рекламируют трафаретчики, закрылся](/sites/default/files/paragraphs/image/photo2019-03-2614-09-22.jpg)
Удзельнікі чата цікавіліся адно ў аднаго, якія віды наркотыкаў і дзе можна набыць, расказвалі пра свой стан пад дзеяннем псіхатропаў, скідалі фота закладак. Пісаць у чат больш нельга, але ўступіць па спасылцы-запрашэнні па-ранейшаму можна.
Рэкламу тэлеграм-канала, пра які ідзе гаворка, можна ўбачыць на многіх вуліцах Мінска, у тым ліку ў мікрараёне Малінаўка. Журналісты Еўрарадыё нядаўна нават пайшлі самі замазваць яе, але камунальнікі іх апярэдзілі.
![Телеграм-канал с наркотиками, который рекламируют трафаретчики, закрылся](/sites/default/files/paragraphs/image/narkota2.jpg)
15 сакавіка Еўрарадыё адправіла ў МУС запыт аб тым, ці робіць ведамства якія-небудзь крокі для пошуку тых, хто гандлюе наркотыкамі праз гэты тэлеграм-канал, і для яго закрыцця. Адказу мы яшчэ не атрымалі, але праца наркакрамы паралізаваная. Выдатна, калі гэта звязана з актыўнасцю супрацоўнікаў наркакантролю, і такім чынам ён дэманструе сваю здольнасць змагацца не толькі з асобнымі закладчыкамі, але і з каналамі пастаўкі наркотыкаў у Беларусь. І нават калі тэлеграм-канал закрыўся без удзелу МУС, гэта ўсё роўна добра.