Святлана Ціханоўская правяла перамовы ў Сенаце ЗША
20 ліпеня Святлана Ціханоўская сустрэлася з дзвюхпартыйнай групай сенатараў ЗША, паведамляе яе прэс-служба.
Як распавядала Еўрарадыё, сенатары стварылі дзвюхпартыйную групу "Сябры Беларусі", куды ўвайшлі як прадстаўнікі рэспубліканцаў, так і дэмакратаў.
Ціханоўская абмеркавала з кіраўніком Камітэта Сената ЗША па міжнародных адносінах Робертам Менендэсам і яго камандай, як скаардынаваць падтрымку Беларусі паміж ЗША і ЕС. Паведамляецца, што Менендэс прымаў беларуску ў зале, дзе традыцыйна праходзяць прыёмы лідараў дзяржаў.
Таксама Ціханоўская сустрэлася з шырокай групай сенатараў. Сенатар Дэн Саліван называў яе пры звароце "мадам прэзідэнт" і выказваў падтрымку ўсім беларусам у яе асобе.
На сустрэчах беларускі палітык расказвала аб рэпрэсіях з боку рэжыму і ўзаемападтрымцы беларусаў. Яна падзякавала сенатарам за адзінства ў падтрымцы беларусаў і заклікала іх узмацняць ціск на рэжым і дапамогу для народа Беларусі.
