Супрацоўніка "Нафтана" арыштавалі за "экстрэмісцкую" песню ў сацсетках
Кадр з роліка "2020" гурта Sumarok / Ігар Палынскі, Sumarok
Наваполацкая суддзя Зінаіда Балаболава на 15 сутак арыштавала работніка ААТ "Нафтан" Яўгена Міхайлоўскага.
Нагодай стала публікацыя "экстрэмісцкай" песні ў сацсетцы "Вконтакте". Прысуд быў вынесены 12 снежня, але вядома пра яго стала толькі цяпер, паведамляюць праваабаронцы з "Віцебскай вясны"
Міхайлоўскі на судзе прызнаў сваю віну. Ён пацвердзіў, што размясціў на сваёй старонцы відэаролік Ігара Палынскага з назвай "Sumarok — 2020", але не ведаў, што яна была напісаная пасля затрыманняў на адным з нядзельных маршаў.
Таксама нафтанавец не ведаў, што кліп быў уключаны ў рэспубліканскі спіс экстрэмісцкіх матэрыялаў.
