Станцыю метро “Плошча Леніна” пераймянуюць напрыканцы сакавіка

Напрыканцы сакавіка адбудзецца паседжанне дэпутатаў Мінгарсавету, дзе абмяркуюць перайменаванне шэрагу сталічных вуліц. Дэпутаты разгледзяць адпаведную пастанову Камісіі па перайменаванні вуліц пры Мінгарвыканкаме. Пра гэта ў гутарцы з Еўрарадыё паведаміў удзельнік камісіі гісторык Іван Сацукевіч. Іван Сацукевіч: “Прапановаў сотні. Ну, напрыклад, Валгаградскую вуліцу некаторыя прапаноўваюць перайменаваць у Сталінградскую. Нейкі чалавек хоча ў гонар свайго бацькі назваць вуліцу. Праходзілі толькі тыя прапановы, якія амаль усімі членамі камісіі аднагалосна прызнаныя патрэбнымі, карыснымі і якія не могуць выклікаць сур’ёзнага канфлікту ў нашым грамадстве”.

Спецыяліст адзначыў, што частковае вяртанне гістарычных назваў цэнтральных вуліц сталіцы мае планавы характар.

Нагадаем, камісія па найменаванні і перайменаванні вуліц Мінгарвыканкаму вырашыла, што станцыя метро "Плошча Леніна" будзе называцца "Плошча Незалежнасці". Таксама яна прапанавала змяніць назвы шэрагу вуліц. Так, вуліца Рэвалюцыйная верне старую назву Койданаўская.