Сталі вядомы падрабязнасці пра галадоўку дзесяці жанчын на Акрэсціна

Прычынай ціску адміністрацыі ЦІПа стала нядаўняя скарга на ўмовы ўтрымання адной з былых арыштантак. Тым, хто быў пад арыштам, аб'явілі: умовы ўтрымання будуць пагаршацца, каб "адвучыць" пісаць скаргі. Напрыклад, паабяцалі, што зробяць толькі сем градусаў цяпла ў камеры.

Падчас дадатковага "шмону" ў 15-й камеры забралі ўсе "непатрэбныя", на думку адміністрацыі, рэчы: зубныя шчоткі, пракладкі, лекі ("Тут вам не санаторый, каб вы маглі лячыцца"). Забралі і медыцынскія маскі, якія выкарыстоўвалі ў якасці гумак для валасоў.

Цяпер "новенькія" арыштанты прыходзяць у камеру з пустымі рукамі — у ЦІПе ўсё забіраюць (сродкі асабістай гігіены, ручнікі і г. д.), таму жанчыны сядзяць без шампуню і зубной пасты. Тую ж туалетную паперу даводзіцца выпрошваць у адміністрацыі. Бутэлькі з вадой, якія арыштанткі выкарыстоўвалі для таго, каб памыцца, пагрэцца і папіць, выкінулі. Па стане на 3 лістапада ў камеры на дзесяць дзяўчат было толькі чатыры зубныя шчоткі, тры бутэлькі для вады і прыкладна сем пракладак.

Жанчыны кажуць, што ў камеры ў арыштаваных ёсць вошы — з'явіліся яшчэ ў верасні, калі падсадзілі адразу трох бяздомных.