Справу магілёўскіх "чорных рыэлтараў" перадалі для накіравання ў суд
Следчы камітэт завяршыў расследаванне крымінальнай справы супраць магілёўцаў, якіх вінавацяць у шасці забойствах з асаблівай жорсткасцю. Крымінальная справа перададзеная ў пракуратуру для накіравання ў суд, інфармуе прэс-служба Следчага камітэта.
Абвінавачаныя — два мужчыны і жанчына. Па звестках следства, яны дзейнічалі ў складзе арганізаванай групы і завалодвалі чужым жыллём. Абвінавачаныя выбіралі сабе ахвяраў з ліку непрацуючых, адзінокіх пітушчых людзей, якія маюць запазычанасці па аплаце камунальных і іншых паслуг за карыстанне жыллём. Зламыснікі ўгаворвалі людзей прадаць сваё жытло. Замест гэтага яны абяцалі дапамагчы ім набыць жыллё меншай плошчы на выгадных умовах.
Пасля таго, як гаспадары прадавалі свае кватэры, зламыснікі забіралі ў іх гэтыя грошы рознымі спосабамі — праз забойствы, спалучаныя з разбоямі, вымагальніцтва і махлярства. Целы забітых яны закопвалі на сельскіх могілках Магілёўскай вобласці. Перад забойствам зламыснікі паілі ахвяраў алкагольнымі напоямі са снатворным.
Следчыя выявілі акалічнасці шасці выкраданняў і забойстваў, а таксама тры падрыхтоўкі да забойстваў, учыненых з 2009 па 2015 год.
Усіх зламыснікаў затрымалі ўвесну 2015 года. Яны знаходзяцца пад вартай.
Падчас папярэдняга расследавання следчыя правялі больш за 150 экспертыз, звыш 500 допытаў сведак, шэсць эксгумацый.
Затрыманых вінавацяць па шэрагу артыкулаў Крымінальнага кодэкса: забойства пры абцяжарвальных абставінах, падрыхтоўка да забойства, выкраданне чалавека, падрыхтоўка да выкрадання чалавека, разбой, вымагальніцтва, махлярства, незаконны абарот псіхатропных рэчываў, знішчэнне дакументаў.
