Словы пра іслам, за якія, магчыма, забілі Барыса Нямцова (тэкст)

Тлумачэнні прычын забойства Барыса Нямцова паводле СМІ, даў абвінавачаны Заур Дадаеў, які шмат гадоў служыў у батальёне “Поўнач”, арганізаваным Рамзанам Кадыравым для правядзення спецаперацый на тэрыторыі Чачні. Па словах абвінавачанага, прычынай забойства Барыса Нямцова сталі не яго апазіцыйныя погляды, а выказванні пра мусульман, іслам, а таксама яго пазіцыя адносна карыкатур з французскага часопіса Charlie Hebdo.

Сваё стаўленне да тэракта ў Парыжы Нямцоў коратка выклаў на сайце “Эха Масквы” 9 студзеня 2015 года пад загалоўкам “Ісламская інквізіцыя”. Падаем тэкст цалкам:

"Іслам — маладая рэлігія. Узнікла яна ў 7 стагоддзі, гэта значыць іслам маладзейшы за хрысціянства прыкладна на 600 гадоў. І калі хрысціяне жывуць у 21 стагоддзі, то мусульмане ў 14-15.

Заўважу, 14-15 стагоддзе — росквіт інквізіцыі, судоў над ерэтыкамі і вогнішчаў са спаленымі жыўцом.

Цяпер мы сведкі сярэднявечнай ісламскай інквізіцыі. Пройдуць стагоддзі і іслам пасталее, а тэрарызм сыдзе ў мінулае. Але сядзець і нічога не рабіць таксама не варта.

Гісторыя інквізіцыі шмат чаму нас вучыць. Па-першае, для спынення рэлігійнага тэрору неабходна змагацца за свецкую дзяржаву, то бок, за аддзяленне мячэці ад улады.

Па-другое, вельмі важная пазіцыя муфтыяў. Калі яны будуць адназначна асуджаць тэрор і забойствы, адлучаць ад ісламу забойцаў, гэта можа моцна дапамагчы перамагчы тэрор.

Па-трэцяе, не павінна быць ніякага апраўдання тэрору. Калі тут некаторыя пішуць, што карыкатурысты самі вінаватыя, што здзекаваліся з прарока Мухамеда, яны апраўдваюць забойства. Забойства — гэта цяжкі грэх, у тым ліку і ў адпаведнасці з Каранам, а сатыра, нават здзеклівая, грахом не з'яўляецца. І параўнанні карыкатурыста з забойцам-фанатыкам толькі правакуюць тэрарыстаў.

Няма чаго забойцаў параўноўваць з журналістамі.

Ясна адно. Іслам як маладая рэлігія знаходзіцца ў Сярэднявеччы і яго чакае доўгая барацьба, каб перамагчы ісламскую інквізіцыю.

Хутка нічога не атрымаецца".

Расійскі апазіцыянер Барыс Нямцоў быў застрэлены ў цэнтры Масквы позна ўвечары 27 лютага. На дадзены момант затрыманыя 5 падазраваных, усе яны з’яўляюцца ўраджэнцамі Чачні і Інгушэціі.