Следчы камітэт затрымаў дырэктара сеткі па гандлі морапрадуктамі "Джон Доры"
Упраўленне Следчага камітэта па Мінску пачало крымінальную справу на дырэктара сеткі па гандлі морапрадуктамі. Яго падазраюць ва ўхіленні ад выплаты падаткаў у асабліва буйным памеры.
Як высветлілі супрацоўнікі Дэпартамента фінансавых расследаванняў Камітэта дзяржкантролю, мужчына рэалізоўваў прадукцыю за наяўны разлік у крамы і сталічныя рэстараны. Атрыманыя грошы не праходзілі праз бухгалтарскі ўлік. Па звестках следства, са студзеня 2015-га па ліпень 2017 года прадпрымальнік наўмысна заніжаў падаткі, дзякуючы чаму не заплаціў больш як 245 000 рублёў.
Падазраванага затрымалі і змясцілі ў ізалятар часовага ўтрымання. З ім працуюць следчыя.
Паводле інфармацыі tut.by, гаворка ідзе пра кіраўніка і заснавальніка гандлёвай сеткі "Джон Доры". Частку выручкі, як паведамляецца, прадпрымальнік праводзіў праз касу, а астатнія грошы ішлі на выплату заробкаў "у канвертах", аплату паслуг перавозчыкаў, а таксама "для асабістага ўзбагачэння кіраўнікоў камерцыйнай арганізацыі".
Выяўлена больш за 60 суб'ектаў гаспадарання, якія куплялі рыбу і рыбную прадукцыю паводле "шэрай" схемы.
