Славенцы на рэферэндуме прагаласавалі супраць аднаполых шлюбаў

У Славеніі прайшоў рэферэндум наконт права аднаполых параў заключаць шлюбы. “За” прагаласавалі толькі 36,58%.

У галасаванні ўзялі ўдзел толькі 35,7% выбаршчыкаў. Але гэтага было дастаткова, каб вынікі рэферэндуму мелі законную моц. Паводле мясцовага заканадаўства, мінімальная яўка мусіць быць 20%.

У сакавіку парламент Славеніі прагаласаваў за легалізацыю аднаполых шлюбаў. Парам надаваліся ўсе падатковыя ільготы і магчымасць усынаўляць дзяцей. Але з ініцыятывы правай кансерватыўнай партыі і каталіцкай царквы гэты заканапраект быў вынесены на рэферэндум.

63,42% тых, хто прагаласаваў, выступілі супраць шлюбнага раўнапраўя. Цяпер закон аб аднаполых шлюбах мусіць быць скасаваны, паведамляе славенская газета Delo.

Замест шлюбаў аднаполыя пары змогуць, як і раней, рэгістраваць так званыя партнёрствы.

Фота: pinknews.co.uk