СК падазрае блогера Матольку ў стварэнні і кіраванні экстрэмісцкай групай

Следчы камітэт рыхтуе дакументы, каб абвясціць блогера Антона Матольку ў міждзяржаўны вышук. На яго пачалі крымінальную справу па некалькіх артыкулах Крымінальнага кодэкса, паведамляе прэс-служба Следчага камітэта.

Следчыя разам з супрацоўнікамі ГУБАЗіК сцвярджаюць, што Матолька мае дачыненне да наступных злачынстваў: 

— масавыя беспарадкі;

— узбуджэнне сацыяльнай варожасці па прыкмеце прафесійнай прыналежнасці;

— арганізацыя і падрыхтоўка дзеянняў, якія груба парушаюць грамадскі парадак;

— стварэнне экстрэмісцкага фарміравання;

— дзеянні, накіраваныя на дэстабілізацыю сацыяльна-палітычнай, эканамічнай і інфармацыйнай абстаноўкі ў краіне, прычыненне шкоды нацыянальнай бяспецы.

Прэс-служба СК заяўляе, што гэтыя злачынствы Матолька ўчыніў праз свой тэлеграм-канал. А дапамогу Матолькі адміністратарам дваровых чатаў следчыя ахарактарызавалі як стварэнне экстрэмісцкага фармавання.

"Акрамя гэтага, дзейнічаючы па папярэдняй змове з невыяўленымі асобамі, знаходзячыся па-за межамі Рэспублікі Беларусь, з мэтай ажыццяўлення супрацьпраўнай дзейнасці А. Матолька аб'яднаў экстрэмісцкія групы (так званыя "дваровыя чаты"), стварыў экстрэмісцкае фармаванне і кіруе ім. Сваімі дзеяннямі ён здзейсніў злачынства, прадугледжанае ч. 1 арт. 361-1 (стварэнне экстрэмісцкага фарміравання) Крымінальнага кодэкса Рэспублікі Беларусь", — гаворыцца ў паведамленні СК.

Таксама следчыя прыгразілі адміністратарам дваровых чатаў крымінальнай адказнасцю — як за стварэнне экстрэмісцкага фармавання.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.