Сітуацыя на фронце застаецца складанай, кажа Зяленскі — 280-я раніца вайны
Весці баявыя дзеянні даводзіцца ва ўмовах непагадзі / facebook.com/GeneralStaff.ua
Сітуацыя на фронце застаецца складанай. Пра гэта казаў у начным відэазвароце прэзідэнт Украіны Уладзімір Зяленскі. Расіяне, нягледзячы на вялікія страты, усё яшчэ спрабуюць наступаць у Данецкай вобласці, замацавацца ў Луганскай і рухацца ў Харкаўскай абласцях. "Нешта там яны плануюць на поўдні", — адзначыў Зяленскі.
Але ўкраінскія ўзброеныя сілы трымаюць абарону і не даюць ворагу, па словах украінскага прэзідэнта, "ажыццявіць яго намеры".
"Яны [рускія] казалі, што захопяць Данеччыну вясной, летам, восенню... На гэтым тыдні пачынаецца ўжо зіма. Яны паклалі там сваё рэгулярнае войска, яны губляюць там штодня сотні мабілізаваных і наймітаў, яны выкарыстоўваюць там загарадатрад", — кажа ўкраінскі прэзідэнт.
Расіяне ўчора дамагліся нязначных поспехаў у раёне Бахмута ў Данецкай вобласці, кажуць у амерыканскім Інстытуце вывучэння вайны. Але экспэрты вельмі асцярожна ставяцца да заяваў расійскіх крыніц аб прарыве ўкраінскай абарончай лініі на поўдзень ад горада і гатоўнасці перарэзаць адну з двух асноўных украінскіх наземных ліній сувязі з Бахмутам.
"Такія заявы, верагодна, з'яўляюцца часткай расійскай інфармацыйнай аперацыі і заўчасныя", — гаворыцца ў справаздачы Інстытута. Там лічаць, што "аслабленыя расійскія сілы вакол Бахмута наўрад ці хутка паставяць горад пад пагрозу немінучага атачэння".
Таксама, паводле ацэнак Інстытута, расіяне ў мінулыя суткі працягвалі абараняцца ад украінскіх контрнаступальных аперацый каля Сватава ў Луганскай вобласці, а УСУ працягвалі тут, а таксама ў раёне Крамянной наступаць. У раёне Крамянной расіяне нават правялі абмежаваныя наземныя атакі, каб вярнуць страчаныя пазіцыі. Атакуюць расіяне і ў раёне Северска і Аўдзееўкі — гэта ў заходняй частцы Данецкай вобласці.
У Генштабе УСУ кажуць, што ў мінулыя суткі адбівалі атакі каля Стэльмахоўкі ў Луганскай і ў раёне населеных пунктаў Белагораўка, Бахмуцкае, Першамайскае, Невельск і Мар'інка Данецкай вобласці. Па словах украінскіх вайскоўцаў, расіяне учора таксама працягвалі абстрэльваць Херсон і вобласць.
Увесь дзень учора расіяне абстрэльвалі прымежную Сумскую вобласць. Яны выпусцілі па вобласці 150 мін і снарадаў. У выніку абстрэлаў есць пашкоджанні інфраструктуры, напісаў ўвечары старшыня Сумскай абласной ваеннай адміністрацыі Дзмітрый Жывіцкі. У Новаслабодскай грамадзе, да прыкладу, пашкоджаныя 3 зернесклады, два трактары, тры аўтамабіля, адміністрацыйны будынак прадпрыемства і лініі электраперадач. У Варажбянскай — 10 прыватных жылых дамоў, электрычныя і газавыя сеткі, у Дружбоўскай — аб'ект крытычнай інфраструктуры і электрасеткі.
Гэтай ноччу расіяне ўдарылі і па Запарожскай вобласці. "У выніку траплення ракеты (верагодна С-300) пашкоджаны газаразмеркавальны пункт", узнік пажар, распавядае кіраўнік абласной адміністрацыі Аляксандр Старух. Пажар патушылі, але без газу засталіся тры вуліцы. Людзі, на шчасце, не пацярпелі.
Гэтай раніцай расіяне абстралялі і Нікапаль — гэта ў Днепрапятроўскай вобласці. Пакуль папярэдне без пацярпелых. Пра гэта распавядае кіраўнік абласной адміністрацыі Валянцін Разнічэнка. А падчас ўчорашняга абстрэлу ў Нікапальскім раёне пацярпела пажылая жанчына. Лекары ацэньваюць яе стан як здавальняючы, дазволілі ёй лячыцца дома.
А ў памежнай Бранскай вобласці Расіі гэтай раніцай гарыць нафтабаза. Плошча ўзгарання склала 1800 кв. метраў, кажа губернатар Аляксандр Багамаз. Прычына ўзгарання пакуль невядомая. Адзначым, што Бранская вобласць мяжуе з Украінай і Беларуссю. Суражскі раён размешчаны ў паўночна-заходняй частцы Бранскай вобласці і мяжуе з Магілёўскай вобласцю.
Расійскія войскі запускаюць па цэлях ва Украіне крылатыя ракеты са знятымі ядзернымі боегалоўкамі. Гэта робіцца, каб вычарпаць запасы ўкраінскай супрацьпаветранай абароны, піша Reuters са спасылкай на вайсковага чыноўніка ЗША. У Пентагоне лічаць, што ўзмацненне ракетных удараў па Украіне часткова заклікана вычарпаць запасы ўкраінскай СПА і канчаткова дамагчыся панавання ў небе над краінай.
Пры гэтым Злучаныя Штаты пакуль не гатовыя даць Украіне зенітна-ракетныя комплексы Patriot, хоць і разглядаюць такую магчымасць. Аб гэтым гаварыў учора прэс-сакратар Міністэрства абароны ЗША Пэт Райдэр. Яго цытуе CNN.
"Цяпер мы не плануем пастаўляць батарэі Patriot ва Украіну, але зноў жа, мы працягнем гэтыя дыскусіі. Калі будзе што аб'явіць з гэтай нагоды, мы гэта зробім", — сказаў ён. Прадстаўнік Пентагона таксама заявіў, што супрацьпаветраная абарона Украіны застаецца прыярытэтам для ЗША.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.