Сілавікі зладзілі ператрусы ў журналістаў у Глыбокім і пад Бялынічамі
![Зміцер Лупач](/sites/default/files/styles/gallery_main/public/2023-12/lupacz-0612.jpg.webp?itok=b8QFbkWW)
Зміцер Лупач / Белсат
Стала вядома пра ператрусы ў кватэрах прынамсі двух недзяржаўных журналістаў у Беларусі.
Адзін ператрус адбыўся ў глыбоцкай кватэры журналіста Змітра Лупача, які пакінуў Беларусь і жыве ў Варшаве, паведамляе БАЖ.
6 снежня міліцыянты па абедзе сталі званіць у кватэру Лупача. Потым яны выклікалі супрацоўнікаў МНС, якія ўзламалі дзверы. Правёўшы ператрус, міліцыянты апячаталі кватэру.
"У кватэры няма нічога асаблівага. Хіба што засталіся дарагія для мяне рэчы, у тым ліку кнігі. Не ведаю, ці знайшлі сярод іх нешта "экстрэмісцкае", — пракаментаваў Лупач гэты ператрус.
Праваабаронцы "Вясны" пішуць таксама пра ператрус у доме Барыса Вырвіча ў Бялыніцкім раёне. Падчас ператрусу канфіскавалі ўсю тэхніку і мабільнікі, а самога журналіста забралі на допыт, аднак потым адпусцілі.
Магчыма, гэта звязана з парталам "6TV Bielarus", дзе Вырвіч раней быў шэф-рэдактарам. Напярэдадні рашэннем КДБ партал быў прызнаны "экстрэмісцкім фармаваннем".
![Сілавікі зладзілі ператрусы ў журналістаў у Глыбокім і пад Бялынічамі](/sites/default/files/styles/default_image_paragraph/public/paragraphs/image/vyrvicz-0612.jpg.webp?itok=z9J14k67)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.