Сілавікі затрымалі за пратэсты аднаго з топ-менеджараў БелАЗа
Кадр з "пакаяльнага відэа " / сацсеткі сілавікоў
Стала вядома пра затрыманне дырэктара цэнтра тэхнічнай падтрымкі "КМА-БелАЗ" у Белгародскай вобласці Расіі Андрэя Фёдарава. "Пакаяльнае відэа" з ім з'явілася ў канале сілавікоў. Мужчына сядзеў у кадры ў падранай кашулі — рукавы былі разарваныя такім чынам, каб сталі бачныя татуіроўкі з нацыянальнымі сімваламі.
Чалавек у кадры на відэа "прызнаецца", што "два разы ўдзельнічаў у нядзельных маршах, пару разоў пакінуў негатыўныя каментары ў дачыненні да супрацоўнікаў [міліцыі. — Заўв. рэд.]". Аўтары гэтага відэа таксама вырашылі паведаміць пра тое, колькі зарабляў затрыманы — атрымліваў "сярэдні заробак 7 тысяч рублёў на месяц". Быў нават апублікаваны скрыншот SMS-паведамлення банка пасля залічэння зарплаты.
