Самагоншчыкаў у Налібоцкай пушчы шукаюць беспілотнікі (фота, відэа)
7 кастрычніка супрацоўнікі Мінскай абласной міліцыі ўпершыню шукалі самагонныя апараты з дапамогай беспілотніка "Бусел — М".
З вышыні птушынага палёту відэаздымкі мясцовасці праводзілася з выкарыстаннем цеплавізара. Пры гэтым "карцінка" перадавалася на зямлю ў рэжыме рэальнага часу.
У лясах Валожынскага раёна былі выяўленыя 4 падазроныя крыніцы цеплавога выпраменьвання. Праведзены рэйд пацвердзіў, што там знаходзяцца самагонныя "заводзікі". У бліжэйшы час, пры дапамозе спецыяльнай тэхнікі, усе апараты будуць дэмантаваныя, вывезеныя і знішчаныя. Міліцыянты высвятляюць асобы самагоншчыкаў з Налібоцкай пушчы.
Як інфармуе прэс-служба Мінскай абласной міліцыі, запланаванае выкарыстанне беспілотніка на тэрыторыі Вілейскага, Маладзечанскага, Мядзельскага і Стаўбцоўскага раёнаў.
Фота, відэа — uvd-mo.gov.by