Сацыёлага Таццяну Вадалажскую асудзілі на 2,5 года "хіміі"
2,5 года "хіміі" запрасіла дзяржабвінавачанне для каардынатаркі "Лятучага ўніверсітэта", сацыёлага Таццяны Вадалажскай, паведамляюць праваабаронцы.
Палітзняволеную навукоўцу судзілі ў судзе Заводскага раёна Мінска. У зале суда Вадалажскую трымалі ў кайданках. Яе вінавацілі за ўдзел у пратэстах па ч. 1 арт. 342 Крымінальнага кодэкса (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх).
Справу разглядаў суддзя Алег Каляда. Ён вынес той прысуд, які прасіў дзяржабвінаваўца. Вадалажскую выпусцілі з-пад варты ў зале суда.
Таццяна Вадалажская — паплечніца філосафа, палітвязня Уладзіміра Мацкевіча, каардынатарка Лятучага ўніверсітэта, сябра Каардынацыйнай рады. У жніўні 2021-га яе затрымлівалі адначасова з Мацкевічам, аднак выпусцілі на волю праз 10 дзён. Вадалажская заставалася ў статусе падазраванай, хадзіла на допыты. У лютым 22-га яе зноў затрымалі і ўзялі пад варту.
Дарэчы, сёння пачаўся суд над яшчэ адной палітзняволенай — галоўнай рэдактаркай "Новага Часу" Аксанай Колб. Для яе пракурор таксама папрасіў 2,5 года "хіміі".
