Жонкі палітвязняў сустрэліся са старшынёй Еўрапарламенту
Брусэль наведалі жонкі палітвязняў Алеся Бяляцкага і Міколы Статкевіча — Наталля Пінчук і Марына Адамовіч.
Наталля Пінчук у каментары Еўрарадыё распавяла пра брусэльскія сустрэчы:
Пінчук: "Першы, з кім адбылася сустрэча, гэта з старшынёй Еўрапарламенту Марцінам Шульцам, з старэйшым дарадцам стратэгічнага планавання Еўрапейскай службы знешняй палітыкі Піркам Тапіёлам. Адбылася супольная сустрэча Камітэта па правах чалавека ЕС і дэлегацыі па адносінах з Беларуссю. У другой палове дня прыватна сустракаліся з дэпутатам Еўрапарламенту з Польшчы Яцэкам Сарыюш-Вольскім, і потым са Штэфанам Фюле, камісарам ЕС па пытаннях пашырэння і палітыцы суседства. Усе яны выказаліся за тое, што пытанне палітвязняў для ўсіх іх вельмі важнае і з'яўляецца адным з асноўных кірункаў, якія яны трымаюць на ўвазе".
Жонкі палітвязняў кажуць, што прадстаўнікі еўраструктур надаюць вялікую ўвагу беларускім палітвязням.
Фота — svaboda.org
