Замест "рэвалюцыянераў" на Акрэсціна засялілі заўзятараў
Усіх арыштаваных за 3 і 6 ліпеня на аўтазаках вывезлі ў Жодзіна. Рыхтуюць месцы на наступную сераду?
"Учора нас адпусцілі недзе без дваццаці восем вечара. Ну вось учора былі чуткі, што гэтыя фанаты прыехалі, а ўсе палітычныя зняволеныя, якія былі тут, іх адправілі на Жодзіна гадзінаў у 8 вечара. Паміж сабой ахоўнікі размаўлялі, што 6 чалавек пакінулі, маўляў, ім тут ёсць месца, але па афіцыйным дадзеным ужо ўсіх вывезлі", — распавёў Еўрарадыё адзін з асуджаных за акцыю 6 ліпеня.
Для сваякоў затрыманых на ўваходзе вывесілі абвестку, каб яны ўжо звярталіся ў Жодзіна, але там таксама нічога не кажуць.
"Паедзем у Жодзіна, — гаворыць маці асуджанага за 6 ліпеня. У Жодзіна пакуль нічога не кажуць. Заўтра павінны сына выпусціць, хацелі удакладніць у колькі забіраць. Пакуль нічога не можам даведацца".
Супрацоўнікі цэнтра ізаляцыі ад пачатку казалі, што асуджанных за маўклівыя акцыі ў іх няма. Ад сваякоў і сяброў футбольных заўзятараў не хацелі прымаць перадачы.
"Гэта спісы людзей, якія ў нас утрымліваюцца. Калі ў іх некага няма, значыць у нас яго няма".
Але аказалася, што гэта хлусня. Калі прыйшла дзяўчына-валанцёр, ёй таксама сказалі, што нікога з удзельнікаў "маўклівых акцый" не засталося. Але потым распавялі, што 5 чалавек засталіся.
"Зразумела, што ўчора прывезлі футбольных заўзятараў, а таксама яны рыхтуюцца да серады. Але і мы рыхтуемся, і ўжо гатовыя людзі — валанцёры на суды", — распавяла Еўрарадыё валанцёр Адарка Кузьміна.
Ля ўвахода ў ізалятар людзі пачалі абурацца, але міліцыянты сказалі, што калі гэта будзе працягвацца, то перадач увогуле можна не чакаць. Таму ўсе разыйшліся і ўжо праз неклькі хвілін ахова вынесла бланкі заяваў.