Выплаты па крэдытах, “завязаных” на стаўку рэфінансавання, выраслі на 50%?

Людзей, якія бралі крэдыты, “завязаныя” на стаўцы рэфінансавання, “Беларусбанк” пачаў пераводзіць на фіксаваныя стаўкі. Зараз, калі СР рэгулярна расце, ужыванне плаваючых працэнтных ставак значна павялічвае рызыку ўзнікнення пратэрмінаванай запазычанасці, патлумачылі Еўрарадыё ў банку.

Прэс-сакратар "Беларусбанка" Ларыса Грынько: "Стаўка была 10,5%. А пасля яна павялічвалася, і цяпер — 20%. І вы ўяўляеце, калі крэдыт прывязаны да стаўкі, значыць, і працэнт па крэдыце будзе ўвесь час расці! А калі быў жорстка 25% або 17%, дык так і застанецца".

На запыт Еўрарадыё спецыялісты “Беларусбанка” паведамілі дзіўную лічбу: "...пры павелічэнні стаўкі рэфінансавання на 1 п.п. памер штомесячнага плацяжу па крэдыце павялічваецца ў сярэднім на 5%". Стаўка рэфінансавання з пачатку года вырасла на 9,5%. Калі верыць спецыялістам “Беларусбанка”, выплаты па крэдытах павінны былі павялічыцца ажно на 9,5*5 = 47,5%. У прэс-службе банка самі засумняваліся ў гэтай лічбе…

Ларыса Грынько: "Так не мусіць быць — гэта вельмі шмат. Ну яна, безумоўна, расце, але не на 5%. Таму і ўсталявалі фіксаваную".

Супрацоўніца банка, якая рыхтавала адказ на запыт Еўрарадыё, знаходзіцца ў камандзіроўцы. Па яе вяртанні мы высветлім, адкуль узялася такая дзіўная лічба.

Вяртаемся да пераводу людзей на фіксаваныя стаўкі. Паводле словаў прэс-сакратаркі “Беларусбанка”, у першую чаргу на іх пераафармляюць шматдзетныя сем'і:

Ларыса Грынько: "Там была стаўка + нейкі працэнт. Яны атрымоўвалі пад 17%. Гэта была стаўка + некалькі працэнтаў. Але банк прыняў рашэнне зафіксаваць на ўзроўні 14%... Таму стаўка будзе расці, а ім застанецца гэты паказчык. Людзі ведаюць, на якую суму яны могуць разлічваць, колькі яны заплацяць і ці здольныя яны вярнуць узяты ў банка крэдыт".

Згодна з інфармацыяй банка, доля крэдытаў, працэнтныя выплаты па якіх залежаць ад змены стаўкі рэфінансавання, у агульнай суме крэдытаў — нязначная. І не перавышае 1%.

"Беларусбанк": “Паколькі 99% крэдытнага партфелю фізічных асобаў складае запазычанасць з фіксаванымі працэнтнымі стаўкамі, павелічэнне стаўкі рэфінансавання не паўплывала негатыўна на паказчыкі дзейнасці банка і не прывяло да пагаршэння якасці актываў”.

Крэдытная ж запазычанасць насельніцтва "Беларусбанку" з пачатку года павялічылася на 20%. І сёння складае 19 трыльёнаў рублёў.

"Беларусбанк": “У той самы час пратэрмінаваная запазычанасць па крэдытах насельніцтва за шэсць месяцаў павялічылася на 200 мільёнаў рублёў і на 1 ліпеня гэтага года склала 1,1 мільярд рублёў”.

Што датычыцца крэдытаў, выплаты па якіх залежаць ад памеру стаўкі рэфінансавання, пратэрмінаваная запазычанасць па такіх крэдытах складае 26 мільёнаў рублёў (2% у агульным аб'ёме пратэрмінаваных крэдытаў насельніцтва).

Нагадаем, 13 ліпеня Нацбанк у шосты раз з пачатку года павысіў стаўку рэфінансавання. Агулам за апошнія 4 месяцы яна вырасла на 9,5% — з 10,5% да 20%. І, як паведамілі ў Нацбанку, працягне расці!