Урад Нямеччыны заклікае вызваліць Андрэя Саннікава
Таксама ўлады гэтай краіны звяртаюцца да афіцыйнага Мінска з заклікам адпусціць усіх іншых палітвязняў.
Аказанне фізічнага і псіхалагічнага ціску на былога кандыдата ў прэзідэнты Андрэя Саннікава абсалютна непрымальнае і з’яўляецца абуральным парушэннем правоў чалавека. Гэта адзначаецца ў заяве ўпаўнаважанага ўраду ФРГ па правах чалавека і гуманітарнай дапамозе Маркуса Лёнінга.
Таксама ён лічыць непрымальным ускладненне ўмоваў утрымання ў месцах пазбаўлення волі іншых палітвязняў. Лёнінг заклікае беларускія ўлады не толькі вызваліць усіх палітзняволеных, але таксама рэабілітаваць іх, інфармуе БелаПАН.
Андрэй Саннікаў асуджаны за падзеі 19 снежня на 5 гадоў пазбаўлення волі. Стала вядома, што яшчэ 20 лістапада ён напісаў прашэнне аб памілаванні на імя Аляксандра Лукашэнкі, але гэты дакумент пакуль не разгледзелі і яго існаванне замоўчвалі.