У Змітра Бандарэнкі з'явіліся новыя праблемы са здароўем
Да праблем са спінай у палітвязня дадалася хвароба сасудаў.
Пра гэта жонка Бандарэнкі Вольга даведалася з лістоў мужа, паведамляе "Хартыя'97". Па яе словах, у Змітра Бандарэнкі пачаліся моцныя галаўныя болі. Жонку праблемы з сасудамі хвалююць больш за боль у спіне.
Нагадаем, што ў зняволенні Бандарэнка перанёс цяжкую аперацыю на пазваночніку. З калоніі ён паведамляў раней, што цэлы месяц трымаецца павышаны ціск і не дапамагаюць ніякія лекі. Праз пяць месяцаў пасля аперацыі яму пачала моцна балець спіна і запалілася кіла шыйна-груднога аддзела. Не выключана, што яму спатрэбіцца новая аперацыя.
