У Расіі не дазволілі паказваць "Плошчу" Хашчавацкага
Мінкульт Расіі адклікаў дазвол на пракат пяці кінафільмаў.
Як паведамляе ВВС, гаворка ідзе пра дакументальныя карціны. Сярод іх дзве стужкі вядомага беларускага рэжысёра Юрыя Хашчавацкага — "Плошча" (пра беларускія падзеі 2006 года) і "Лабатамія" (пра адносіны Расіі і Грузіі).
Акрамя таго пад забарону трапілі фільм "Бунт. Справа Літвіненкі" і "Замах на Расію" (пра выбухі дамоў у 1999 годзе), а таксама "Фабрыка катаванняў ці педагагічны досвед" — фільм екацярынбургскага праваабаронцы Сакалова.
Прычынай фактычнай забароны на паказ фільмаў называецца адсутнасць прамых дамоваў пракатчыка са студыямі-вытворцамі.
Па словах пракатчыкаў, чыноўнік з Мінкульта вусна паведаміў, што для аднаўлення пракатнага пасведчання трэба падаць згоду ад усіх, хто ўдзельнічаў у вытворчасці фільмаў — рэжысёраў, прадзюсараў і іншых.
