У эфір выйшаў “Гомель offline” (фота)
Першае рэгіянальнае інтэрнэт-тэлебачанне пачало сваю працу ў Гомелі, яго прэзентавалі ўвечары 24 красавіка.
Праект з такой назвай стаў “першапраходцам” Інтэрнэт-тэлебачання на Гомельшчыне.
Стартавы выпуск праграмы амаль цалкам прысвечаны трагедыі на Чарнобыльскай АЭС і погляду на яе ў цяперашні час. Тут можна ўбачыць рэпартаж з Нароўлі пра ўдзельніка ліквідацыі катастрофы, апытанку з вуліц горада пра неабходнасць у Беларусі ўласнай атамнай станцыі, а таксама гутарку з экспертам-маркетолагам Аляксеем Харкевічам, які дае адказ на пытанне “Ці трэба развіваць экстрэмальны турызм у забруджаных радыяцыяй раёнах?”.
Як кажуць самі арганізатары “Гомель offline”, праект будзе сканцэнтраваны на людзях, падзеях і з’явах, без якіх немагчыма ўявіць жыццё Гомеля. Выходзіць праграма пакуль што будзе раз на месяц, аднак ужо зараз пачынаецца праца над другім выпускам, які, верагодна, будзе прысвечаны андэграўндаму жыццю абласнога цэнтра.
