У Брусэлі пройдзе дыялог Беларусі і ЕС па эканамічных і фінансавых пытаннях
Другі раўнд дыялогу адбудзецца 21 лістапада. Першы прайшоў 6 кастрычніка 2011 года ў Мінску.
На паседжанні ў Брусэлі будуць абмяркоўвацца стан дзяржаўнай пазыкі і макраэканамічная сітуацыя ў Беларусі, паведамляе interfax.by са спасылкай на беларускае МЗС.
Акрамя таго, беларускі бок падасць інфармацыю аб прыватызацыі і эканамічнай лібералізацыі ў Беларусі, стане справаў у Мытным саюзе Беларусі, Казахстана і Расіі.
Беларускую дэлегацыю ў Брусэлі ўзначаліць намеснік міністра эканомікі Дзмітрый Голухаў. У яе ўвойдуць намеснік міністра фінансаў Максім Ермаловіч, пастаянны прадстаўнік Беларусі пры ЕС Андрэй Еўдачэнка.
З боку ЕС у дыялогу прымуць удзел прадстаўнікі Генеральных дырэктаратаў Еўракамісіі па эканамічных і фінансавых пытаннях, па дапамозе ў мэтах развіцця, па гандлі, а таксама Еўрапейскай службы вонкавых дзеянняў.
Фота — rus.ruvr.ru
