У Беларусі з’явілася месца, дзе збіраюць дарожныя ямы

Згодна
са стандартамі, калі яма на дарозе перавышае па плошчы памеры 30 на 30
сантыметраў і яе глыбіня большая за 5 сантыметраў, такая выбоіна павінна быць
агароджаная спецыяльным плотам, бо нясе небяспеку для ўдзельнікаў дарожнага
руху. Аб праекце расказвае яго заснавальнік Павел Баташоў.

111027 batashou s.mp3

Баташоў: 
“Праект, які мы ўзялі за ўзор, ужо даўно існуе ў Расіі. Я ўжо больш за 10 гадоў
з'яўляюся актыўным аўтамабілістам і падумаў, што трэба б было нешта зрабіць з
нашымі дарогамі. Бо беларускае заканадаўства прадугледжвае скаргі на дрэннае
дарожнае пакрыццё як у дзяржаўныя органы, так і непасрэдна ў суд. Наш сайт –
гэта такая сацыяльная сетка, дзе людзі могуць паскардзіцца на наяўнасць ям. Усё
гэта скіравана на больш камфортнае жыццё нашых аўтамабілістаў. Можа, з часам
гэта ператворыцца ў моцны грамадскі рух і прымусіць чыноўнікаў, адказных за
дарогі, болей варушыцца. Сёлета я пабываў у розных краінах — і на Захадзе, і на
Усходзе, — магу засведчыць, што ямы ёсць усюды. І на мой погляд, сітуацыя на
нашых дарогах яшчэ адносна добрая і паляпшаецца год ад году.

Еўрарадыё:
А навошта тады ваш сайт, калі сітуацыя, як вы кажаце, год ад году паляпшаецца?


Баташоў:
Я казаў пра транспартныя магістралі, а першыя здымкі з ямамі, якія сталі нам
прысылаць, знаходзяцца недзе на перыферыі, у дварах і на пад'ездах да
шматпавярховых дамоў. І гэта вялікая праблема. Бо там высокія начальнікі не
ездзяць, і таму больш дробныя чыноўнікі спяць сабе ў шапку, да іх не дагрукацца.

Еўрарадыё:
Можа некалькі слоў пра тое, як і што мусіць рабіць чалавек, які такую яму
заўважыў?

Баташоў:
Мы стварылі гэты сайт як рэсурс за бяспеку на дарогах. І актыўныя людзі могуць
карыстацца нашым сайтам, каб адаслаць сваю скаргу чыноўнікам. Рэгістрацыя не
патрэбная. І на сайце ўжо ёсць падрыхтаваныя фармуляры скаргі. А чыноўнік, згодна
з заканадаўствам, павінен адказаць на скаргу на працягу пятнаццаці дзён і
паведаміць, як ён на гэтую скаргу адрэагаваў.

Еўрарадыё:
Ці не ўлічваеце вы такі момант, што дзяржорганы будуць ігнараваць такія
інтэрнэт-скаргі?


Баташоў:
Максімальны тэрмін адказу чыноўніка на скаргу выносіць 30 дзён. Пасля гэтага,
калі ніякіх дзеянняў з боку чыноўніка па прывядзенні сітуацыі ў парадак не
будзе, можна несці скаргу ў суд па ланцужку.

Еўрарадыё:
На сайт ужо звярнула ўвагу шмат людзей. Ці не плануеце вызначыць нейкую
ўзнагароду таму, хто прышле фотаздымак самай вялікай і жудаснай ямы?


Баташоў:
Пакуль што не. Бо мы не праводзілі рэйтынгаў яшчэ, а таксама рэсурс існуе на
прыватныя сродкі, якія я бяру са свайго сямейнага бюджэту. Да таго ж, я не маю
магчымасці атрымліваць грошы ад спонсараў, калі б яны з'явіліся. У бліжэйшай
будучыні нічога такога не плануецца. Але з часам... чаму не? Тым больш, што сайт
знаходзіцца ў адкрытым доступе толькі двое сутак і ўжо такая папулярнасць.
Думаю, што ўсё ў нас наперадзе.