У Баранавічах заяц збіў кантралёра
Цяпер на агрэсіўнага пасажыра завялі крымінальную справу за хуліганства.
Інцыдэнт адбыўся 12 лютага ў прыгарадным аўтобусе Баранавічы-Ягодная. 42-гадовы нецвярозы мужчына ехаў у госці да сваёй дзяўчыны, заснуў і праехаў патрэбны прыпынак, піша Intex-press.
У вёсцы Перхавічы ў аўтобус увайшлі кантралёры. Яны паглядзелі на паказаны пасажырам квіток, сказалі, што прыпынак, які пазначаны ў праязным дакуменце, ён праехаў і папрасілі заплаціць штраф.
Аднак замест гэтага мужчына падскочыў да адной з жанчын-кантралёраў і ўдарыў яе па твары. На дапамогу прыйшоў кіроўца рэйсавага аўтобуса, а таксама аўтобуса, які вазіў кантралёраў. Парушальніка скруцілі і выклікалі міліцыю.