Скарлет Ёхансан распавяла пра сваё беларускае паходжанне
"Мая сям’я паходзіць з Мінска, з Беларусі", — паведаміла вядомая акторка на прэзентацыі фільма "Мсціўцы" ў Маскве. Сама яна ў Беларусі яшчэ не была.
Паводле слоў Скарлет Ёхансан, яе маці вельмі хвалявалася, калі давелася, што яна ляціць ва Усходнюю Еўропу.
"Наша ніва" нагадвае, што ў фільме "Мсціўцы" акторка выканала ролю расійскай Наташы Раманавай, па мянушцы Чорная Удава. Па словах актрысы, яе зацікавіў вобраз расійскай шпіёнкі, не ў апошнюю чаргу з-за яе каранёў.
Скарлет Ёхансан нарадзілася ў 1984 годзе, у сям’і архітэктара Крыстэна Ёхансана і Мэлані Слоўн, якая паходзіць з беларускіх яўрэяў. Найбольш вядомыя ролі Ёхансан выканала ў фільмах "Цяжкасці перакладу", "Чорная архідэя", "Сенсацыя". Цяпер у фільмаграфіі актрысы болей за 30 фільмаў. Акрамя кіно, Ёхансан яшчэ спявае і выступае ў ролі мадэлькі.
