Рабочы “Граніту” у Мікашэвічах абвясціў галадоўку
Кіроўца “БелАЗа” Леанід Гладзевіч выказвае такім чынам пратэст супраць ціску на сябраў незалежнага прафсаюзу.
Актывіст незалежнага прафсаюзу кажа, што ўжо другі дзень галадае. Аднак паведаміць пра гэта Радыё Свабода ён здолеў толькі цяпер, бо знаходзіўся ў міліцыі. Леанід Гладзевіч правёў там суткі.
З яго словаў, адміністрацыя “Граніту” пачала ціснуць на бацькоў яго жонкі, каб яна, у сваю чаргу, паўплывала на актывіста і прымусіла адмовіцца ад удзелу ў незалежным прафсаюзе.
Спадар Гладзевіч кажа, што плануе трымаць галадоўку да таго часу, пакуль незалежны прафсаюз на “Граніце” не даб’ецца рэгістрацыі.