Норма 140 літраў на чалавека: мінчукі сталі часцей выклікаць сантэхнікаў
"Калі кран цячэ, крычаць, каб хутчэй прыбег сантэхнік", — кажуць у ЖЭС.
Паводле назіранняў некаторых мінскіх ЖЭСаў, пасля таго, як за лішнюю ваду прыйшлося пераплачваць, людзі пачалі часцей выклікаць сантэхнікаў.
"Выклікаюць па такіх праблемах, калі цячэ кран і трэба замяніць. Цяпер усе пачалі звяртаць на гэта ўвагу", — распавядаюць у ЖЭС № 120 Мінска.
Паколькі ў многіх кватэрах ужо шмат гадоў стаяць лічыльнікі вады, то за кранамі прызвычаіліся сачыць даўно. Але ж цяпер нават калі кран трошкі прапускае, клічуць сантэхнікаў, каб адрамантавалі, гавораць Еўрарадыё ў ЖЭС №103.
"Крычаць, каб бегма беглі. Кажуць, хутчэй, тэрмінова, я ж плачу".
Але з-за эканоміі часцей стала засмечвацца каналізацыя ў мыйках на кухнях. Такіх выклікаў стала больш у мінскім ЖЭС №58.
"Мы мыем тлустыя талеркі. Раней, калі вада была свабодна, чалавек мог пусціць і прамываць гэта ўсё. А цяпер, канешне, людзі эканомяць, прычым вельмі эканомяць".
Але гэтак жа ў палове ЖЭСаў заявак болей не стала. У разлікова-касавым цэнтры гавораць, што расход пакуль не падлічвалі, але на першы погляд людзі не пачалі моцна эканоміць. Відаць, яшчэ не зразумелі, што гэта такое.
"Заявак і так досыць шмат. Па колькасці, здаецца, нічога не змянілася. Але вось у нас зараз заяўка: як спускалі памідоры ва ўнітаз, так і спускаюць. Людзі пакуль не ўсвядомілі, што трэба эканоміць".
У 2010 годзе сярэдні расход вады па Мінску і абласных цэнтрах быў 153 літры на чалавека ў дзень. Гэта вышэй за норму толькі на 13 літраў, таму ў сярэднім вялікай эканоміі не назіраецца. Але калі адныя пачалі больш эканоміць, то "тыя, хто заўсёды мог дазволіць сабе ліць шмат вады, так і лье", — гавораць у ЖЭС №97, які абслугоўвае элітны катэджны пасёлак насупраць "Мінск-арэны". Там расход вады не зменшыўся зусім.
Калі параўнаць верасень і кастрычнік, то агулам па Мінску людзі злілі вады на 267,2 тысячы кубоў меней — гэта эканомія ў 3%.
Ці эканомяць жыхары сталіцы ваду? Пра гэта Еўрарадыё запыталася ў мінакоў.
