Litesound вышуквае плагіят у ўдзельнікаў "Еўрабачання-2012" (аўдыё)

08/06/2012 - 11:18

На сваёй старонцы "Вконтакте" музыкі гурта Litesound выкладаюць міксы трэкаў удзельнікаў сусветнага песеннага конкурсу, дзе дадаюць падобныя, але больш вядомыя ды раннія кампазіцыі. Усё гэта называецца "Чым і кім натхняліся зоркі "Еўрабачання-2012! Плагіят ці выпадковасць?". Сярод "злоўленых на крадзяжы" значыцца нават пераможца конкурсу шведская спявачка Loreen, чыя песня Euphoria нагадала беларусам трэк Stole My Heart гурта One Direction.

"У прынцыпе, там ёсць пэўнае падабенства, але яно не такое, каб вялікае, каб казаць пра нейкія праблемы, - тлумачыць свае посты ў сацыяльнай сетцы лідар гурта Зміцер Каракін. - У нас ні ў якім разе няма ніякай крыўды! Проста ёсць жаданне, паслухаць усё, прааналізаваць і, хутчэй, пажартаваць ды пасмяяцца".

Сам жа Зміцер не можа сказаць, што натхняўся чым-небудзь, калі пісаў песню "We are the Heroes", але не адмаўляе, што прыглядаўся да творчасці мінулых пераможцаў "Еўрабачання" Аляксандра Рыбака ды Марыі Шарыфавіч.