Эка-актывісты спрабуюць уратаваць парк з дапамогай кітайскай амбасады

Як паведамляе БелаПАН, грамадскае аб'яднанне "Экадом" накіравала зварот у пасольства Кітая ў Беларусі. Эколагі заяўляюць, што пры будаўніцтве комплексу парк будзе знішчаны і ўжо не зможа выконваць сваёй ранейшай функцыі — быць месцам адпачынку, шпацыраў і заняткаў спортам мінчукоў. Аўтары падкрэсліваюць гістарычную і экалагічную значнасць парку, дзе ў ліпені 1944 года прайшоў знакаміты парад партызанскіх войскаў.

"Экадом" звяртае ўвагу кітайскіх дыпламатаў на тое, што рашэнне пра будаўніцтва гатэля "Пекін" на тэрыторыі парку прымалася "без уліку меркавання жыхароў раёна і горада". Грамадскія актывісты заклікаюць дыпламатаў КНР паспрыяць пераносу гатэльнага комплексу ў іншае месца. Як варыянт называецца прамзона насупраць парку.

Зварот падтрымалі яшчэ восем арганізацый, якія ўваходзяць у міжнародны кансорцыўм "Еўрабеларусь".