Дырэктара "Белсата" назвалі еўрапейкай года
Агнешцы Рамашэўскай-Гузы прысудзілі прэстыжную ўзнагароду "за кампанію на карысць свабоды і дэмакратыі ў Беларусі".
Але галоўнай яе заслугай называецца стварэнне незалежнага тэлеканалу "Белсат".
Як адзначае Радыё "Свабода", лаўрэата прэміі вызначаюць супольна 20 еўрапейскіх выданняў часопісу Reader’s Digest.
У цырымоніі ўручэння ўзнагароды ўзялі ўдзел прадстаўнікі МЗС Польшчы, кіраўніцтва часопісу ды бацькі Агнешкі Рамашэўскай-Гузы Сафія і Збігнеў Рамашэўскія — легендарныя апазіцыянеры часоў Польскай Народнай Рэспублікі.
Сёлета ўзнагарода Reader’s Digest прысуджаецца 18-ы раз. Раней яе лаўрэатамі былі, сярод іншых, Лінус Торвальдс — стваральнік аперацыйнай сістэмы "Лінукс", Шымон Панэк — заснавальнік арганізацыі "Чалавек у нядолі".
Фота — svaboda.org