Дэпутат Глаз: Не можа быць, каб суды настолькі няправільна тлумачылі закон!
Адзін з “бацькоў” закона “Аб масавых мерапрыемствах” заступаецца за журналістак, якіх аштрафавалі за фотасесію з плюшавым мішкам.
Еўрарадыё: У Мінску журналістак Юлію Дарашкевіч і Ірыну Козлік прыцягнулі да адміністрацыйнай адказнасці за фотасесію з плюшавым мішкам. Ці чакалі вы, калі працавалі над законам “Аб масавых мерапрыемствах”, што яго могуць скарыстаць такім чынам?
Анатоль Глаз: Кожную справу, нават самую разумную, і самы разумны дакумент можна давесці да абсурду, калі тыя, хто яго выконвае, не разумеюць сутнасці дакумента. Я не чуў пра тое, пра што вы пытаецеся. Але калі гэта так ― я не лічу, што гэта правільна.
Еўрарадыё: Ці змяняе што-небудзь тое, што ў журналістак быў намер, выкласці фотаздымкі ў інтэрнэт? Як вам фармулёўка “пікетаванне шляхам фотаграфавання”, выкарыстаная ў пратаколе?
Анатоль Глаз: Нават суд адбыўся?
Еўрарадыё: Так, адбыўся суд, і іх прысудзілі да штрафаў.
Анатоль Глаз: Па-першае, тое, што яны хацелі здымкі выкласці, не робіць гонару самім журналісткам. Так, здарылася ў нашай краіне непрыемнасць з гэтымі мішкамі шведскімі. З яе трэба высновы рабіць ― тым, хто павінен іх рабіць. А смяяцца з таго, што адбываецца ў сваёй краіне, ― я гэта не ўхваляю, нават казаць прыкра. Але калі тое, што вы кажаце, праўда, дык на мой погляд… Ну, я ў самым пачатку сказаў.
Еўрарадыё: Усё ж такі трактоўка закона неналежная?
Анатоль Глаз: Але ж яны маюць права яе абскардзіць! Не можа быць, каб суды ў нас настолькі ўжо не разбіраліся, няправільна тлумачылі закон, каб падтрымаць гэта абвінавачанне. Кожны грамадзянін Беларусі мае права сфатаграфавацца нават са слупом, а не толькі з мішкамі.
Еўрарадыё: Давайце вернемся да закона. Азначэнне пікетавання там вельмі падрабязнае.
Анатоль Глаз: Ёсць трактоўка таго, што такое пікетаванне, і я яе добра памятаю.
Еўрарадыё: Відаць, журналісты ўжо набілі аскому вам з гэтым пікетаваннем.
Анатоль Глаз: Не, вы памыляецеся. Дык вось, пікетаванне ― гэта дзеянне. Чалавек павінен з мэтай, якую ён пераследуе, з плакатам ці лозунгам стаяць, ці пляскаць, ці яшчэ што. Але фатаграфаванне ― гэта не пікетаванне. А што за мішка ў іх там быў? Дзе ўзялі яго, з сабой прынеслі?
Еўрарадыё: Так, гэта быў адзін з мішак, якіх шведы скінулі на парашуце.
Анатоль Глаз: Дык сфатаграфаваліся б у сваёй кватэры, ды і змясцілі б у інтэрнэт! Ну чаго было ісці на вуліцу? Ай-яй-яй, дзіцячы садок. Але ж, напэўна, гэта дзве асобы не сталага ўзросту, а маладога?
Еўрарадыё: Гадоў па 25, недзе так.
Анатоль Глаз: Па 25 ― ужо мусілі б разумець. Але, не зважаючы ні на што, гэта не зусім пікетаванне ў тым класічным разуменні гэтага паняцця, якое ёсць у законе. Але ж я не суддзя, у дэталях магу быць не вельмі пэўны. Я думаю, што гэтым прысудам тыя, хто затрымліваў і судзіў, толькі зрабілі журналісткам большы аўтарытэт, не больш за тое.
Фота: інфармагенцтва "БелаПАН".