Бананы, лімоны ды персікі выкідваюць з крамаў на сметнік
Прадаўцы скардзяцца, што людзі ўвогуле не купляюць садавіну, таму кошты даводзіцца… зніжаць.
Еўрарадыё нечакана заўважыла, што паводле дадзеных Белстату ў ліпені цэны на бананы і персікі знізіліся. А вось родная бульба ды яблыкі, наадварот, падаражэлі!
Атрымліваецца, наша інфляцыя — з-за беларускай бульбы, а не імпартных бананаў? Чаму так адбываецца, высвятляла Еўрарадыё.
У людзей папросту няма грошай, каб набываць бананы. Таму цэны даводзіцца зніжаць, тлумачаць падзенне цэнаў на садавіну ў фірме-імпарцёры "Альмепрод":
“Калі раней чалавек купляў дзіцю галінку бананаў, то цяпер ён купіць адзін або два. У людзей няма грошай і яны думаюць, як ім купіць малако і хлеб, а не бананы і персікі. Таму, адпаведна, рынак усім гэтым насычаны, і, адпаведна, пастаўшчыкам даводзіцца зніжаць цану. Я лічу, гэта галоўны фактар. Аб’ёмы знізіліся па ўсёй краіне”.
У мінскай краме, якая прадае садавіну і гародніну, кажуць, што кожны дзень выкідваюць імпартную прадукцыю… на сметнік!
Крама садавіны і гародніны: “Ну, садавіна імпартная… я пра яе і казаць не буду. У мяне яна не ідзе. Штодня толькі паціху выкідваем. Яна вельмі дарагая. Яблыкі імпартныя… я паціху выкідвала, выкідвала — і выкінула іх. На сёння ў мяне ўвогуле няма імпартнай прадукцыі. Толькі апельсіны, лімоны, бананы. Іх не купляюць! Ну, хто будзе купляць мандарыны па 20 тысяч? Вельмі дрэнна купляюць і бананы…”.
Цэны на садавіну зніжаюцца, таму што раней былі… завышаныя, кажуць у фірме “Магнір”:
“Па-першае, сезоннасць. У сезон цана заўсёды падае. Магчыма, зрабілі большы запас у чаканні росту курсу, а пасля пакупніцкі попыт упаў — і цану знізілі. Зменшылі гандлёвую надбаўку…”.
Бульба ў Беларусі за апошні месяц падаражэла на 15,6%. Але ў крамах ды базах гародніны, а таксама на фермерскіх гаспадарках пра гэта ад Еўрарадыё чуюць упершыню.
Фермерская гаспадарка Рынга: “У мяне, наадварот, усё патаннела. Калі я бульбу ў чэрвені прадаваў ад 3 да 5 тысяч, то цяпер цана без падатку на дадатковую вартасць знізілася да 900 рублёў. Буракі таксама патаннелі. Усе кошты пайшлі ўніз. Буракі былі больш за 2 тысячы — цяпер 1400. Паўсюль так. Не толькі ў мяне”.
Капусту тут увогуле прадаюць у страту!
“Бо інакш яна проста прападзе. Хутчэй за ўсё, гэта гандаль. Магчыма, у іх з’явілася вольніца па нацэнках?”.
Але і ў крамах кажуць, што цэны на бульбу падаюць.
Крама садавіны і гародніны: “Бульба даўно па цане 2200, і на буракі не падвышалася цана, а падае. Цана ўпала і на рынку”.
Такая ж сітуацыя і ў базах гародніны.
База гародніны: “У нас цэны, наадварот, панізіліся. Калі бульба ў нас, напрыклад, у чэрвені каштавала 5250, то ў ліпені ўжо была 4000, а ў жніўні — 1800. У нас няма падвышэння па гародніне, наадварот — паніжэнне. У жніўні цэны ў нас стабілізаваліся і не змяняюцца”.
Ва ўпраўленні спажывецкіх цэнаў Белстата тлумачаць, што бульба падаражэла па ўсёй краіне. І толькі ў Мінску цэны знізіліся.
