Аўтамабільная акцыя адбудзецца без кампаніі "За аўто"
Увечары ў сераду 14 верасня аўтамабілісты збіраюцца выехаць на акцыю пратэсту супраць павышэння цэнаў.
У інтэрнэце з'явілася інфармацыя, што ў Мінску акцыя распачнецца ад 19.00. Аўтамабілісты будуць рухацца па праспекце Незалежнасці ад вуліцы Сурганава да ГУМа.
Нагадаем, што сёння кошты на бензін выраслі ў сярэднім на 3%. Супраць павышэння і плануюць пратэставаць аўтааматары. Дырэктар інфармацыйна-асветніцкай установы "За аўто" Арцём Шаркоў паведаміў Еўрарадыё, што яны ў арганізацыі акцыі не ўдзельнічаюць:
Шаркоў: "Інфармацыя сапраўды такога кшталту распаўсюджваецца. І некаторыя аўтамабілісты маюць намер выехаць на гэтыя акцыі. Але гэта ўсё робіцца не цэнтралізавана, а на ўзроўні самаарганізацыі нейкай. А мы са свайго боку інфармацыю такога кшталту не распаўсюджваем і аб гэтым не кажам".
Установа "За аўто", па словах Шаркова, зараз працуе над прапановамі для Савета міністраў наконт коштаў на паліва. Дамоўленасць пра гэта была дасягнутая на круглым стале напрыканцы жніўня.
