Рэдактар румынскай газеты “Prosport” Дорын Кёцэ:

“Неверагодна, каб вашыя абаронцы былі такімі
слабымі”
, — адказаў Еўрарадыё рэдактар галоўнай румынскай спартовай газеты. — Чаму вы ўпэўнены, што ў суботняй гульні “не ўсё чыста”?
Вы бачылі гэты футбол на свае вочы?

— Думка наконт подкупу з’явілася таму, што беларуская
каманда гуляла вельмі дрэнна супраць балгараў. Тут, у Бухарэсце, яны вельмі
добра згулялі з Румыніяй. Але супраць Балгарыі не рабілі нічога цікавага. Матч
ішоў у жывым эфіры па другім канале румынскага тэлебачання, я яго сам бачыў. І
мая ўласная думка: неверагодна, наколькі абаронцы і паўабаронцы Беларусі былі
слабымі.

Беларуская каманда вельмі добрая. Васіль Хамутоўскі
лічыцца тут вельмі добрым гульцом. Таксама ў нас добрая думка пра Аляксандра
Глеба і яго брата. І таму мы не чакалі такой гульні супраць Балгарыі. Гэты матч
вельмі дзіўны. Я бачыў, як добрыя гульцы гулялі вельмі дрэнна. Можа, яны
аслеплі, можа, у іх быў вельмі дрэнны дзень. Я не магу сцвярджаць. Я магу
толькі ставіць пытанні. Дарэчы, нават балгарскае спартовае агенцтва
распаўсюдзіла версію пра подкуп.

— Але ці ёсць у вас нейкія доказы подкупу?

— Я не думаю, што хтосьці з футбалістаў ці трэнераў мог
рызыкаваць, удзельнічаючы ў подкупе. Ведаеце, футбол ва ўсходнееўрапейскіх
краінах поўны спекуляцыяў. У Румыніі таксама. Мы падазраем у гэтым шмат матчаў
у румынскіх чэмпіянатах. Я не вельмі добра ведаю беларускіх кіраўнікоў,
трэнераў. Але калі б такая з’ява і існавала ў Беларусі, ніхто б не рызыкаваў з
доказамі. Асабіста я не маю доказаў подкупу.

Адзіны доказ — гэта матч. Такі інтрыгоўны
матч. Давайце назавём яго інтрыгоўным. Я не думаю, што Балгарыя раптам стала
такой моцнай за некалькі месяцаў. У іх ёсць некалькі добрых гульцоў. Але, на
маю думку, яны не такія моцныя, каб гуляць з Беларуссю такім чынам.

Мы ж ведаем, што мэта вашай зборнай — выйсці ў фінал чэмпіянату
Еўропы 2012 года. Я думаю, што ў Беларусі і ў Балгарыі няма столькі грошай, каб
заплаціць за такія спекуляцыі. Але я думаю, што беларусы будуць вельмі
зацікаўленыя ў гульні з Румыніяй 8 верасня. Думаю, што Румынія выйграе ў
Беларусі, але не так проста.

— Вы ведаеце, што Беларуская федэрацыя футболу збіраецца
падаваць на вас у суд за паклёп?

— Хтосьці з Беларускай федэрацыі футболу тэлефанаваў мне
ўчора і пытаўся маю думку. Беларуская футбольная федэрацыя можа падаваць на нас
у суд, можа рабіць, што хоча. Мы, журналісты, не баімся, бо мы сутыкаліся з
такімі сітуацыямі шмат разоў у сваёй кар’еры. Мы не абвінавачваем беларускую
федэрацыю. Мы проста надрукавалі думку, якую выказала балгарская прэса. Мы
бачылі матч. І мы не дурні, як беларускія кіраўнікі могуць думаць.

Дарэчы, невядома, што горш: калі беларусы
прадал
і гульню, ці калі
гэта яны так
гуляюць
...

Гутарыла Віталіна Грахоўская