Распранулі да майткаў: журналісты з Расіі правялі тры гадзіны ў мінскай міліцыі

16 сакавіка ў Мінску спачатку затрымалі, а потым адпусцілі двух расійскіх журналістаў: Паўла Нікуліна і Яна Патарскага. Абодва яны працуюць у рэдакцыі альманаха moloko plus. У сталіцу Беларусі хлопцы прыехалі, каб прачытаць лекцыю пра малыя медыя — такія, як іх альманах.

Каля 16:00 яны былі затрыманыя каля ўваходу ў "Беларускі прэс-клуб", дзе павінна была прайсці лекцыя. Перад гэтым міліцыянты перапісвалі дадзеныя тых, хто прыйшоў на мерапрыемства, і здымалі іх на відэа.

Каля 19:00 Нікулін і Патарскі выйшлі з аддзялення міліцыі. Па іх словах, пратаколаў аб адміністрацыйным правапарушэнні на іх складзена не было — міліцыянты абмежаваліся рапартамі аб затрыманні. У журналістаў канфіскавалі 32 асобніка альманаха moloko plus, прысвечаных рэвалюцыям у свеце, а таксама стыкеры. Усё гэта пройдзе экспертызу на прадмет экстрэмізму.

Калі экстрэмізм знойдзецца, расіян прыцягнуць да адміністрацыйнай адказнасці. Пакуль жа Нікулін і Патанскі маюць права вярнуцца дадому.

"Нам сказалі, што мы распаўсюджваем экстрэмісцкія матэрыялы, — пасля вызвалення распавёў Еўрарадыё выдавец moloko plus Павел Нікулін. — Мне як рэдактару гэтых матэрыялаў вядома, што ў Расіі яны не забароненыя. У Беларусі іх таксама быццам бы ніколі не адбіралі.

У нас фатаграфавалі татуіроўкі. Мне давялося распрануцца да майткаў, таму што ў мяне шмат татуіровак.

Тое, як з намі размаўлялі супрацоўнікі міліцыі, я магу назваць халоднай ветлівасцю, то бок, гэта вымушаная ветлівасць. Мне здаецца, што нам не верылі. Яны рабілі выгляд, што вераць мне, ветліва ўсміхаліся, але малюначак у галаве ў іх іншы. Яны быццам бы лічылі, што мы з нейкай іншай мэтай сюды прыехалі. Пыталіся, ці знаходзімся мы ў нейкіх рухах. Мы, акрамя як у прафсаюзе журналістаў, нідзе не ўдзельнічаем".

Ян Патарскі распавядае, што мэтай візіта ў Беларусь была лекцыя пра тое, як ствараць малыя медыя, а не прэзентацыя альманаха:

"У нас ёсць наш часопіс, які мы выпускаем, гэта малое медыя, таму ў нас ёсць досвед у гэтым. Мы хацелі падзяліцца досведам з нашымі беларускімі чытачамі, калегамі. Нават у загалоўку нашай сустрэчы не было інфармацыі, пра што наш альманах. Сувязь паміж нашым альманахам і гэтай лекцыяй толькі ў тым, што гэтую лекцыю чытаюць ўдзельнікі альманаха".

Акрамя альманахаў, у журналістаў хацелі канфіскаваць футболкі. Але ўсё ж не сталі.

— Я доўга тлумачыў, што на нашым мерчы намаляваная фламандская архітэктура. Гэта сабор, — распавядае Патарскі.

— Ламбардская, напэўна! — папраўляе Нікулін.

— Я сказаў фламандская, — працягвае Патарскі. — Потым выпраўляў граматычныя памылкі за супрацоўнікам міліцыі, які пісаў пратакол, і ён не мог запомніць слова "фламандская", таму слова "ламбардская" выбіла б яго наогул. Калі б было слова "ламбард", нас бы прывязалі да якіх-небудзь фінансавых правапарушэнняў, а ў нас грошай няма.

У Паўла Нікуліна ёсць некалькі версій, чаму двое расійскіх журналістаў зацікавілі беларускую міліцыю:

"Я не вельмі разумею: гэта была самадзейнасьць мясцовых органаў ці яны настолькі спагадныя, што выконвалі нейкія расійскія просьбы. Мне распавядалі, што мясцовыя сілавікі зацята сочаць, "каб тут нічога Расія не рабіла", таму што ў іх ёсць прафесійны гонар. Яны незадаволеныя, калі Расія тут нешта пракручвае, як, напрыклад, была гісторыя з выкраданнем [украінца Паўла] Грыба. З іншага боку, а чаму б і не? Па нейкіх пытаннях можна сварыцца, па нейкіх супрацоўнічаць. Яны ўвогуле думалі, што мы анархісты, што ўваходзім у нейкія рухі.

У Расіі СМІ пісалі, што нам плацяць Хадаркоўскі, Навальны, Захад, што мы звязаны з Ісламскай дзяржавай. І гэта не быў нейкі сцёб — тыя людзі, якія гэта сцвярджалі, упэўненыя ў гэтым. Цяпер вось дадалося, што мы звязаныя з рухам анархістаў. Ну, у прынцыпе, гэта нядрэнны паслужны спіс. Амаль няма чаго дадаць, хіба што нацыстаў і Ірландскую рэспубліканскую армію. І ўсё!"

Мінская міліцыя ў афіцыйным прэс-рэлізе заявіла, што расіян: "20-гадовага непрацуючага жыхара г. Масква і 30-гадовага студэнта маскоўскага ВНУ" — затрымалі для высвятлення асобаў. "У грамадзян была выяўленая літаратура, якая змяшчае заклікі да экстрэмісцкай дзейнасці, — сказана ў паведамленні на сайце ГУУС Мінгарвыканкама. — У дачыненні да згаданых грамадзян распачаты адміністрацыйны працэс па арт. 17.11 ("Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці ці прапагандуе такую ​​дзейнасць") КаАП Рэспублікі Беларусь". Літаратура канфіскаваная, а 19-й гадзіне грамадзяне адпушчаныя, праводзіцца праверка.

moloko plus — гэта некамерцыйны альманах, прысвечаны праблемам гвалту. У ім працуюць прафесійныя журналісткі і журналісты, "якія стаміліся ад цэнзуры і ангажаванай парадку дня ў расійскіх федэральных СМІ".

Раней выйшлі тры нумары альманаха: "Тэрарызм", "Наркотыкі" і "Рэвалюцыя". Зараз каманда працуе над чацвёртым нумарам: "Патрыярхат".