Ракетны абстрэл Адэсы і сусветная рэакцыя на кадры з Бучы — 40-я раніца вайны
Горад Буча пасля выхаду расійскіх войскаў / ЕРА
Па Адэсе гэтай ноччу быў нанесены ракетны ўдар. Аб гэтым перадае "Громадське" са спасылкай на спікера Адэскай ваеннай адміністрацыі Сяргея Братчука. Ўдарылі "па адным з аб'ектаў". Падрабязнасцяў пакуль няма. Выбухі гэтай ноччу былі чутныя і ў Херсоне. Раніцай ўдарылі па Мікалаеву.
Паводле звестак украінскага Генштаба, напярэдадні ў Данецкай і Луганскай абласцях былі адбітыя сем атак расійскіх войскаў. Кіраўнік Луганскай адміністрацыі Сяргей Гайдай распавёў аб двух загінулых валанцёрах у горадзе Навадружэск. Яны раздавалі гуманітарную дапамогу мясцовым жыхарам, калі пачаўся мінамётны абстрэл.
"Дарэчы, адна з загінулых выратавала жыццё калегу, прыкрыўшы яе сабой, калі пачаўся расійскі абстрэл", — напісаў Гайдай.
Кіраўнік Сумскай адміністрацыі Дзмітрый Жывіцкі ўчора позна ўвечары паведаміў, што рускія тэхніка і артылерыя пакінулі тэрыторыю вобласці. "Засталіся невялікія групы рускіх, якіх ужо шукаюць. Праходзіць зачыстка тэрыторыі", кажа ён.
Генштаб ВСУ ноччу апісваў сітуацыю так: праціўнік "часова адмовіўся ад выканання задання па блакаванні і захопу горада Кіева". Але пры гэтым ён працягвае "наносіць ракетныя ўдары па аб'ектах крытычнай інфраструктуры на ўсёй тэрыторыі Украіны".
Працягваюцца спробы заблакаваць Харкаў — расійскія войскі абстрэльваюць горад з артылерыі, кажуць у Генштабе УСУ. Ідуць баі за Марыупаль — "пры падтрымцы авіяцыі і артылерыі праціўнік працягвае штурм горада".
Паводле звестак украінскіх вайскоўцаў, расійскія падраздзяленні, якія былі выведзеныя ў Беларусь, рыхтуюць да перадыслакацыі ў РФ.
"Па наяўнай інфармацыі, асобныя падраздзяленні акупантаў з складу Паветрана-дэсантных войскаў перакідваюцца ваенна-транспартнымі самалётамі ў горад Белгарад", — гаворыцца ў паведамленні ўкраінскага Генштаба.
Першапачатковыя планы Расіі захапіць усю краіну, у прыватнасці Кіеў, пацярпелі няўдачу, лічыць дзяржсакратар ЗША Энтані Блінкен. Пра гэта ён заявіў у інтэрв'ю NBC. Тэзісы яго выступлення прыводзіць "Громадське". Пры гэтым Блінкен мяркуе, што Масква ўсё яшчэ можа справакаваць у Кіеве масавую гібель людзей і разбурэнні з дапамогай авіяцыі і ракет.
Палітыкі і грамадскасць працягваюць рэагаваць на кадры з украінскага горда Буча. На гэтым фоне ў Малдове сёння абвесцілі жалобу па загінулых ва Украіне.
Прэм'ер-міністр Вялікабрытаніі Барыс Джонсан паабяцаў зрабіць усё, каб "замарыць голадам вайсковую машыну Пуціна". Паводле яго слоў, Вялікабрытанія ўзмацняе санкцыі супраць РФ і ваенную падтрымку Украіны.
Прэзідэнт Польшчы Анджэй Дуда заявіў, што здымкі з Бучы "абвяргаюць перакананне, што мы павінны шукаць кампраміс любой цаной". Па яго словах, абаронцам Украіны цяпер патрэбныя тры рэчы: зброя, зброя і яшчэ раз зброя.
Расія на гэтым фоне запатрабавала тэрміновага склікання Рады бяспекі ў панядзелак, 4 красавіка. У Маскве кажуць, што здымкі з Бучы — гэта правакацыя "радыкалаў". "Громадське" нагадвае, што пазачарговае пасяджэнне Рады Бяспекі ўжо запланаванае на 5 красавіка — будуць абмяркоўваць расійскую агрэсію супраць Украіны.
Тым часам журналісты прааналізавалі спадарожнікавыя здымкі амерыканскай Кампанія Maxar Technologies з Бучи. На фота бачна, што рыхтаваць месца для брацкай магілы на тэрыторыі храма Андрэя Першазванага пачалі яшчэ 10 сакавіка.
Ukrainian civilians' bodies have been found littered around Bucha, other areas in NW Kyiv region. A mass grave was found at Church of St. Andrew & Pyervozvannoho All Saints. Satellite images from @Maxar show the first signs of excavation were on March 10. Latest images March 31. pic.twitter.com/6lKxRYEDd7
— Christopher Miller (@ChristopherJM) April 3, 2022
Прэзідэнт Украіны Уладзімір Зяленскі выступіў на цырымоніі ўзнагароджання "Грэмі". Ён казаў аб вайне і аб тым, што зараз перажывае яго краіна. Зяленскі адзначыў, што ўкраінскія музыкі цяпер носяць вайсковую форму замест смокінгаў і спяваюць перад параненымі ў шпіталях.
Між тым, па дадзеных ААН, з пачатку вайны ва Украіне загінулі па меншай меры 1417 мірных жыхароў, яшчэ 2038 атрымалі раненні. Гэта дадзеныя на 3 красавіка. Пры гэтым чыноўнікі ААН падкрэсліваюць, што гэта недакладныя лічбы — фактычныя значна вышэйшыя. На гэты момант пакуль немагчыма атрымаць інфармацыю аб ахвярах з месцаў, дзе дагэтуль вяліся інтэнсіўныя баявыя дзеянні.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.