Работнікі ў Беларусі змогуць браць дадатковы выхадны для медагляду

Работнікі ў Беларусі змогуць браць дадатковы выхадны на праходжанне медагляду. Прычым гэты выхадны будзе аплачвацца. Адпаведную норму хочуць замацаваць у заканадаўстве, распавяла ў эфіры Беларускага тэлебачання міністр працы і сацыяльнай абароны Ірына Касцевіч.

"Цяпер абмяркоўваем магчымасць уключэння такой нормы, па якой работніку даваўся б адзін аплачаны дзень на праходжанне дыспансерызацыі", — сказала Касцевіч.

Гэта рашэнне было прадыктавана, па яе словах, вялікім разрывам у працягласці жыцця паміж мужчынамі і жанчынамі. Такім чынам, відавочна, мужчын хочуць прастымуляваць больш уважліва ставіцца да свайго здароўя.

Ужо ў верасні папраўкі плануюць унесці на разгляд ва ўрад, а да канца года — перадаць у парламент. Па словах Касцевіч, браць выхадны, які будзе аплачвацца, для медагляду можна будзе ўжо са студзеня 2023 года.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.