Пуцін падпісаў указ аб веснавым прызыве. У войска пойдуць 150 тысяч расіян
![Салдаты расійскага войска](/sites/default/files/styles/gallery_main/public/2024-03/large_5.jpg.webp?itok=6dnFjwpT)
Салдаты расійскага войска / "Грамадскае"
З 1 красавіка па 15-га ліпеня ў войска забяруць 150 тысяч расіян. Гэта вынікае з новага ўказа Уладзіміра Пуціна аб веснавым прызыве. І гэта будзе самы масавы прызыў за апошнія восем гадоў.
Справа ў тым, што па новых правілах, якія ў Расіі дзейнічаюць ад пачатку 2024-га года, цяпер прызыву падлягаюць мужчыны ва ўзросце ад 18 да 30 гадоў. Выключэнне складаюць тыя, каму 27 гадоў споўнілася да канца мінулага года і запаснікі, якім ужо ёсць 28 або 29 гадоў.
Межы прызыўнога ўзросту ў Расіі змянілі ў 2023 годзе па прапанове мясцовага міністра абароны Сяргея Шайгу. У рамках той жа ваеннай рэформы ўзаконены электронныя павесткі, а тым, хто атрымаў павестку і не з'явіўся ў ваенкамат, забаронена пакідаць краіну.
Па інфармацыі расійскага выдання "Вёрстка", у найбліжэйшай будучыні мінабароны Расіі збіраецца мабілізаваць 300 тысяч чалавек. Крыніцы выдання з Адміністрацыі расійскага прэзідэнта сцвярджаюць, што Пуцін рыхтуе новы наступ на Харкаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.