Пуцін адклікае 17 тысяч вайскоўцаў ад мяжы з Украінай
Гэтак званыя “летнія вучэнні” расійскіх войскаў на палігонах у Растоўскай вобласці скончыліся.
Прэзідэнт Расіі Уладзімір Пуцін даручыў Міністэрству абарону вярнуць да месцаў сталай дыслакацыі войскі, якія праходзілі вучэнні на палігонах каля ўкраінскіх межаў. Як паведамляе ТАСС, такое даручэнне ён даў у суботу ў часе працоўнай сустрэчы з міністрам абароны Сяргеем Шойгу пасля аператыўнай нарады са сталымі сябрамі Савету бяспекі РФ.
“Міністр далажыў Вярхоўнаму Галоўнакамандуючаму аб завяршэнні летняга перыяду навучання на палігонах Паўднёвай ваеннай акругі”, — паведаміў прэс-сакратар прэзідэнта Дзмітрый Пяскоў.
“Па выніках справаздачы Пуцін даручыў прыступіць да вяртання войскаў да месцаў сталай дыслакацыі”, — сказаў ён.
“Агулам гаворка ідзе пра 17,6 тысяч вайскоўцаў, якія ўлетку праходзілі вучэнні на палігонах у Растоўскай вобласці”, — дадаў Пяскоў.
