Прыгожын сцвярджае, што расіяне працягваюць уцякаць з пазіцый каля Бахмута
Руіны Бахмута / ria.ru
Кіраўнік ПВК "Вагнер" Яўген Прыгожын сцвярджае, што расіяне працягваюць уцякаць з пазіцый каля Бахмута. З-за гэтага сітуацыя на флангах "вагнераўцаў" каля горада складваецца паводле "найгоршага сцэнару".
"Тыя тэрыторыі, якія крывёю і жыццямі нашых баявых таварышаў браліся шмат месяцаў, кожны дзень — праходзячы па дзясятках або сотнях метраў — сёння практычна без бою кідаюцца тымі, хто павінен утрымліваць нашы флангі", — цытуе словы Прыгожына @bazabazon.
Украінскія крыніцы пацвярджаюць некаторыя поспехі ў наваколлі горада — на флангах украінскія войскі змаглі вызваліць некаторыя тэрыторыі, узяць палонных. Паколькі ў ПВК "Вагнер" вялікія страты, там пазіцыі займалі падраздзяленні расійскай арміі. 9 траўня Яўген Прыгожын ужо заяўляў, што адно з падраздзяленняў Узброеных сіл Расіі пакінула свае пазіцыі ў раёне Бахмута: "Збеглі ўсе і агалілі фронт шырынёй амаль два кіламетры і глыбінёй 500 метраў".
Аднак сітуацыя ў самім Бахмуце цяжкая — украінскае войска кантралюе невялікі раён на захадзе горада і працягвае адбіваць атакі "вагнераўцаў".
