Прэм’ер Андрэй Кабякоў едзе ў Гомельскую вобласць
Прэм'ер-міністр Беларусі Андрэй Кабякоў накіроўваецца сёння з рабочай паездкай у Гомельскую вобласць, паведамляе БЕЛТА са спасылкай на прэс-службу ўраду. Прэм'ер наведае малочна-таварную ферму унітарнага прадпрыемства "Міхайлаўскае-агра", дзе будуць разгледжаныя вынікі працы сельгасарганізацый вобласці і меры па іх фінансавым аздараўленні.
Падчас рабочай паездкі Андрэй Кабякоў азнаёміцца з вынікамі рэалізацыі праекта па рэканструкцыі Беларускага газаперапрацоўчага завода "Беларуснафта", наведае міні-ЦЭЦ на мясцовых відах паліва філіяла "Рэчыцкія электрасеткі" РУП "Гомельэнерга".
У праграме паездкі таксама наведванне завода па вытворчасці драўняна-валакністых пліт ААТ "Гомельдрэў", дзе гаворка пойдзе пра перспектывы развіцця прадпрыемства і працу па дыверсіфікацыі рынкаў збыту. Прэм'ер-міністру даложаць аб фінансава-гаспадарчай дзейнасці ААТ "Рэчыцадрэў" і рэалізацыі прадпрыемствам інвестыцыйных праектаў па тэхнічным пераўзбраенні вытворчасці.
