Праваабаронцу з Пінска пакаралі вялікім штрафам за значок з "Пагоняй"
Алесь Рамановіч / Фота з сацсетак
Праваабаронцу з Пінска Алеся Рамановіча аштрафавалі на 3 840 рублёў. Такое рашэнне прыняў мясцовы суд, расказваюць калегі-праваабаронцы.
Падставай для суда зрабіўся значок "Пагоня". Рамановіч нагадаў суддзі, што герб "Пагоня" прызнаны ў Беларусі гісторыка-культурнай каштоўнасцю.
"А ў адказ суддзя спытала: "А вы ведалі, што "Пагоня" выкарыстоўваецца як сімвал пратэсту?" — расказаў праваабаронца.
Ён мае намер абскардзіць рашэнне суда. Раней Рамановіч таксама расказваў журналістам пра невыносныя ўмовы ў Пінскім ІЧУ. Ён назваў іх катаваннямі.
"Мяне хацелі запалохаць, звесці з розуму. Яны стварылі камеру катаванняў, проста не ўжывалі фізічную сілу", — казаў праваабаронца. Паводле яго слоў, яго катавалі недасыпам, холадам і адмаўляліся вадзіць у туалет.
