Прадпрыемства адмовілася ад іску па публікацыі фота мыла на вяровачцы

Завод парашковай металургіі ў Маладзечне адмовіўся ад іску да "Рэгіянальнай газеты" па публікацыі фота мыла на вяровачцы. На прадпрыемстве лічылі, што яна шкодзіць яго дзелавой рэпутацыі.

Згаданы здымак з'явіўся на сайце маладзечанскага выдання восенню 2019-га, яго даслаў адзін з чытачоў (загаловак пачынаўся словамі "Каб не скралі..."). Мыла на вяровачцы было прывязана ў прыбіральні прадпрыемства. Дырэктар заявіў, што гэта правакацыя. Завод падаў іск да газеты ў эканамічны суд Мінскай вобласці. Сярод патрабаванняў былі — абвяржэнне апублікаванай інфармацыі, прадастаўленне звестак пра асобу, якая даслала здымак (каб яе прыцягнуць да адказнасці).

На суд нават выклікалі спецыяліста з Інстытута мовазнаўства. Акадэмік Аляксандр Лукашанец падтрымаў газету. Ён заявіў, што негатыўнай інфармацыі пра завод у публікацыі няма, словы не нясуць дадатковай ацэначнай семантыкі.

22 студзеня стала вядома, што бакі дасягнулі міравога пагаднення. Прадпрыемства не толькі адмовілася ад іска, але і аплаціць палову выдаткаў газеты на паслугі адваката, паведамляе rh.by.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.