Полацкую мастачку за "абразу прадстаўніка ўлады" асудзілі на прымусовае лячэнне
Нэлі Алфёрава / фота з старонкі ў сацсетках
У судзе Полацкага раёна і Полацка 18 чэрвеня вынеслі прысуд 38-гадовай мастачцы і рамесніцы Нэлі Алфёравай, паведамляе праваабарончы цэнтр "Вясна".
Жанчыну вінавацілі ў абразе прадстаўніка ўлады (арт. 369 КК). Судзілі яе ў закрытым рэжыме як "асобу, якая ўчыніла грамадскі небяспечнае дзеянне". 19 ліпеня прозвішча Алфёравай з'явілася ў "экстрэмісцкім спісе МУС". Адтуль стала вядома, што палачанцы прызначылі прымусовае лячэнне.
Верагодна, падставай для крымінальнага пераследу сталі допісы Алфёравай у сацсетках. Працэс вёў Уладзімір Бясецкі.
У 2021 годзе Алфёрава пакінула Беларусь і перабралася ў Польшчу. Аднак праз нейкі час яна вырашыла вярнуцца на радзіму.
У жанчын ёсць непаўналетні сын з інваліднасцю.
