Першы з двух кантынгентаў марской пяхоты ЗША прыбыў на Блізкі Усход
Ці будзе наземная аперацыя ў Іране? / Reuters
Вашынгтон накіраваў тысячы марскіх пяхотнікаў на Блізкі Усход. Яны прыбылі 27 сакавіка на борце дэсантнага карабля. Washington Post са спасылкай на амерыканскіх чыноўнікаў паведаміла, што Пентагон рыхтуецца да некалькіх тыдняў наземных аперацый у Іране, магчыма з удзелам сіл спецыяльных аперацый і звычайнай пяхоты.
Ці ўхваліць прэзідэнт Дональд Трамп планы па разгортванні наземных войскаў — пакуль застаецца незразумелым, паведамляе выданне. Раней агенцтва Reuters пісала, што Пентагон разглядаў ваенныя варыянты, якія могуць уключаць наземныя сілы.
Дзяржаўны сакратар Марка Рубіа заявіў, што ЗША здольныя дасягнуць сваіх мэтаў без наземных войскаў, аднак перакідваюць сілы ў рэгіён, каб забяспечыць Трампу “максімальную” гнуткасць.
Washington Post сцвярджае, што Пентагон спачатку плануе сухапутную аперацыю па захопе іранскага вострава Харк і на прыбярэжных пазіцыях каля Армузскага праліва.
Востраў знаходзіцца на поўначы Персідскага заліва, прыкладна ў 30 км ад узбярэжжа і каля 500 км ад Армузскага праліва. Там размешчаны галоўныя іранскія нафтавыя тэрміналы, праз якія праходзіць 90% марскога нафтавага экспарту краіны. Да гэтага часу ЗША і Ізраіль не атакавалі гэтую інфраструктуру — знішчаліся толькі ваенныя аб’екты.
Іран заявіў пра гатоўнасць адказаць на наземны напад ЗША. Іранскі рэжым абвінаваціў Вашынгтон у падрыхтоўцы сухапутнага наступлення ў той час, калі ён дамагаўся перамоваў, а рэгіянальныя дзяржавы праводзілі кансультацыі ў Пакістане, спрабуючы спыніць баявыя дзеянні.
Ізраіль працягвае наносіць авіяўдары па Іране
Пакуль ЗША і Іран абменьваюцца пагрозамі, ізраільскія вайскоўцы працягваюць наносіць авіяцыйныя ўдары па Іране. 29 сакавіка 2026 года іх сілы нанеслі ўдары па інфраструктуры вытворчасці ўзбраенняў у Тэгеране, уключаючы дзясяткі аб’ектаў захоўвання і вытворчасці.
Ізраіль таксама нанёс удары па мэтах у Ліване ў межах сваёй кампаніі супраць падтрымліваемай Іранам тэрарыстычнай арганізацыі Хезбала.
Ізраіль таксама нанёс удар па будынку, у якім размяшчаўся катарскі тэлеканал Al-Araby TV у Тэгеране.
