Павук-тарантул на Прыпяці, а багамол — каля Гомеля

“Гэта паўднёварускі тарантул. Самкі могуць дасягаць пяці сантыметраў, самцы ўдвая меншыя. Гэта памер цела, без лапак. Візуальна ён можа дасягаць васьмі сантыметраў. Харчуецца, як усе павукі, бесхрабетнымі жывёлінамі збольшага — насякомымі”, — малодшы навуковы супрацоўнік лабараторыі наземных бесхрабетных жывёл НПЦ "НАН Беларусі па біярэсурсах" Уладзіслаў Іваноў апісвае беларускіх тарантулаў.

Гэтыя павукі цяпер жывуць на Гомельшчыне, на ўзбярэжжы Прыпяці і Сожа. Не тыповыя для беларускай фауны тарантулы прыйшлі са стэпаў Украіны і Расіі, бо пацяплела. Гняздуюцца ў норках, палююць уначы. Тэарэтычна, могуць цапнуць і чалавека, папярэджвае Уладзіслаў Іваноў.

“Зарэгістраваных выпадкаў, каб яны кусалі людзей, няма. Укус балючы, пры алергічнай рэакцыі можа быць і пагроза для чалавека. Найбольш небяспечна гэта для дзяцей, у іх можа быць галавакружэнне”, — папярэджвае Еўрарадыё Уладзіслаў Іваноў.

Але тарантул пужлівы і, хутчэй, збяжыць сам, чым нападзе не чалавека, супакойвае намеснік дэкана біялагічнага факультэта Гомельскага дзяржаўнага ўніверсітэта імя Францыска Скарыны Мікалай Галіноўскі:

“Яны жывуць у глыбокіх норках, па 30-40 сантыметраў. Тарантул вельмі пужлівы, схаваецца сам, калі яго ўбачыць. Яго укус як укус шэршня”.

З самых небяспечных у Беларусі жывёл ён называе гадзюк. А тых, хто б пагражаў жыццю чалавека не прыгадвае наогул.

Акрамя тарантулаў у Беларусі прыжыліся таксама багамолы і павукі-восы.

“Павук-аса, ён належыць да сям'і нашых павукоў-крыжавікоў. Раней яго не рэгістравалі ў прынцыпе, а цяпер — па ўсёй тэрыторыі Беларусі. Ён досыць вялікі і таксама можа цапнуць. Але наступстваў не будзе”, — тлумачыць Уладзіслаў Іваноў.

А багамолаў каля Гомеля ўжо дзве папуляцыі, даводзіць навуковец Мікалай Галіноўскі. Багамол — таксама драпежнік. Але палюе толькі на мух.

“Асаблівай шкоды ён не наносіць. Знішчае ўсё, што бачыць: мух, пчол. Але чалавеку не шкодзіць”.

У Гомельскую бальніцу хуткай дапамогі з-за нападзення тарантулаў не звярталіся. Там прыгадваюць толькі адзін укус змяі ў гэтым сезоне.

“Не вядома, якая змяя была. Павукоў не было, тарантулаў таксама”, — кажуць у гомельскай гарадской бальніцы.

І прыгадваюць, што з кляшчамі прыходзяць па пяць-шэсць чалавек за дзень.

Фота: zoopicture.ru

Відэа: youtube.com