Пасля затрымання Дурава расійская прапаганда кінулася на абарону свабоды слова
![Акцыя салідарнасці з Паўлам Дуровым у Маскве](/sites/default/files/styles/gallery_main/public/2024-08/photo_2024-08-25_12-44-41.jpg.webp?itok=KJvG53Cs)
Акцыя салідарнасці з Паўлам Дуровым у Маскве / "Новыя людзі"
Пасля затрымання ў Францыі Паўла Дурава расійская прапаганда кінулася на абарону свабоды слова. "Ліберальная дыктатура не церпіць адзіночак, якія прэтэндуюць на свабоду і гуляюць не па яе правілах", — ёміста сфармуляваў прапагандысцкі наратыў член Савета федэрацыі Аляксей Пушкоў.
МЗС РФ расказвае, што зробіць усё для абароны расійскага грамадзяніна, які трапіў у бяду за мяжой. Амбасада Расіі ў Францыі запытала консульскі доступ да Паўла Дурава — і абвінаваціла французскія ўлады ва "ўхіленні ад узаемадзеяння".
Пасты аб Дураве апублікавалі ўладальнік "Х" Ілан Маск і журналіст Такер Карлсан. Выказаўся нават экс-прэзідэнт РФ Дзмітрый Мядзведзеў:
"Для ўсіх нашых агульных цяпер ворагаў ён рускі — і таму непрадказальны і небяспечны. Іншай крыві. Дакладна не Маск і не Цукерберг (дарэчы, які актыўна супрацоўнічае з ФБР). Дураву трэба, нарэшце, зразумець, што Айчыну, як і часы, не выбіраюць..."
Расійская партыя "Новыя людзі" тым часам правяла акцыю ў падтрымку Паўла Дурава ля амбасады Францыі ў Маскве. Палітыкі і актывісты ў брэндаваным адзенні расклалі ля будынка папяровыя самалёцікі — сімвалы тэлеграма. З іх дапамогай у Расіі пратэставалі ў 2018 годзе, калі ўлады спрабавалі заблакіраваць месенджар.
Расійскі журналіст Андрэй Мядзведзеў звяртае ўвагу на непрыемную для Крамля акалічнасць затрымання Паўла Дурава. Паводле яго слоў, тэлеграм — "гэта галоўны мэсанджар цяперашняй вайны". Праз яго праходзіць велізарная колькасць камунікацыі паміж расійскімі вайскоўцамі, у тым ліку і кіраванне войскамі.
І Мядзведзеву, і іншым прапагандыстам вельмі не падабаецца, што месенджар можа апынуцца пад большым кантролем заходніх спецслужбаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.